Библия на церковно-славянском языке - транслитерация современным русским алфавитом
(1751)

Книга пророка Софонии

◄◄ | ◄ | Глава ⚫ | ► | ►►

¹ О, светлый и избавленный граде, голубице!

² Не услыша гласа, не прият наказания, на Господа не упова и к Богу своему не приближися.

³ Князи его в нем, яко львы рыкающе, судии его яко волцы аравийстии, не оставляху на утро.

⁴ Пророцы его ветроносцы, мужие презорливи: священницы его сквернят святая и нечествуют в закон.

⁵ Господь же праведен посреде его и не имать сотворити неправды: утро утро даст суд Свой в свет: и не укрыся, и не весть неправды во истязании, ниже в распри обиды.

⁶ В растление низложих величавыя, изчезоша углы их: опустошу пути их весьма, еже не проходити: изчезоша гради их, занеже ни единому быти, ни жити.

⁷ Рех: обаче убойтеся Мене и приимите наказание, и не имате потребитися от очию его, за вся елика отмстих на нем: готовися, утренюй, истле все листвие их.

⁸ Сего ради потерпи Мене, глаголет Господь, в день воскресения моего во свидетелство: зане суд Мои в сонмища языков еже прияти царей, еже излияти на ня гнев Мой весь, гнев ярости Моея: зане огнем рвения Моего поядена будет вся земля.

⁹ Яко тогда обращу к людем язык в род его, еже призывати: всем имя Господне, работати Ему под игом единем.

¹⁰ От конец рек Ефиопских прииму молящыя Мя, в разсеянных Моих принесут жертвы Мне.

¹¹ В день он не имаши постыдитися от всех начинаний твоих, имиже нечествовал еси в Мя: яко тогда отиму от тебе укоризны досаждения твоего, и ктому не имаши приложити величатися на горе святей Моей.

¹² И оставлю в тебе люди кротки и смиренны, и будут благоговети о имени Господни

¹³ останцы Израилевы, и не сотворят неправды, и не возглаголют суетных, и не обрящется в устех их язык льстив: зане тии пожируют и угнездятся, и не будет устрашаяй их.

¹⁴ Радуйся, дщи Сионова, зело, проповедуй, дщи Иерусалимова, веселися и преукрашайся от всего сердца твоего, дщи Иерусалимля:

¹⁵ отят Господь неправды твоя, избавил тя есть из руки враг твоих: воцарится Господь посреде тебе, и не узриши зла ктому.

¹⁶ Во время оно речет Господь Иерусалиму: дерзай, Сионе, да не ослабеют руце твои.

¹⁷ Господь Бог твой в тебе, Сильный спасет тя, наведет на тя веселие и обновит тя в любви Своей, и возвеселится о тебе во украшении, яко в день праздника.

¹⁸ И соберу сотреныя твоя: горе, кто приимет нань поношение?

¹⁹ Се, Аз сотворю в тебе тебе ради, глаголет Господь, во время оно: и спасу утисненную и отриновенную прииму, и положу я в похваление и имениты по всей земли.

²⁰ И постыдятся во время оно, егда добро вам сотворю, и во время, егда прииму вы: зане дам вы имениты и в похваление во всех людех земли, внегда возвращати ми пленение ваше пред вами, глаголет Господь.