Библия на церковно-славянском языке - транслитерация современным русским алфавитом
(1751)

Книга пророка Захарии

◄◄ | ◄ | Глава ⚫ | ► | ►►

¹ Пророчество словесе Господня в земли Седраха и Дамаска жертвы его: зане Господь призирает на человеки и на вся колена Израилева,

² и во Имафе в пределех его Тир и Сидон, яко умудреша зело.

³ И созда Тир твердыни себе и собра сребро яко персть и злато яко брение путий.

⁴ Сего ради Господь наследит я и поразит в море силу его, и той огнем поястся.

⁵ Увидит Аскалон и убоится, и Газа и поболит зело, и Аккарон, яко постыдеся о уповании своем: и погибнет царь от Газы, и Аскалон не имать населитися.

⁶ И вселятся иноплеменницы во Азоте, и разрушу досаждение иноплеменников,

⁷ и изму кровь их из уст их и мерзости их из средины зубов их, и оставятся и сии Богу нашему и будут яко тысящник во Иуде, и Аккарон якоже Иевусей.

⁸ И подставлю храму Моему воздвижение, еже не сквозе ходити, ниже возвращатися, и ктому не имать приити на ня изгоняяй: яко ныне видех очима Моима.

⁹ Радуйся зело, дщи Сионя, проповедуй, дщи Иерусалимля: се, Царь твой грядет тебе праведен и спасаяй, той кроток и всед на подяремника и жребца юна.

¹⁰ И потребит колесницы от Ефрема и кони от Иерусалима, и потребит лук бранный, и множество, и мир от языков: и обладает водами от моря до моря и от рек до исходищ земли.

¹¹ И ты в крови завета твоего испустил еси узники твоя от рова не имуща воды.

¹² Сядите в тверделех, связани сонмища, и за един день пришелствия твоего сугубо воздам ти.

¹³ Занеже напрягох тя Себе, Иудо, яко лук, исполних Ефрема, и воздвигну чада твоя, Сионе, на чада Еллинска, и осяжу тя яко мечь ратника.

¹⁴ И Господь на них явится, и изыдет яко молния стрела Его: и Господь Бог Вседержитель в трубу вострубит и пойдет в шуме прещения своего.

¹⁵ Господь Вседержитель защитит их, и поядят я, и посыплют их камением пращным, и испиют кровь их яко вино, и исполнят окрины яко жертвенник.

¹⁶ И спасет я Господь Бог их в день он, яко овцы люди Своя: зане камение свято валяется на земли Его.

¹⁷ Аще что благо его, и аще что добро его, пшеница юношам и вино благоуханно девам.