Библия на церковно-славянском языке - транслитерация современным русским алфавитом
(1751)

Книга пророка Захарии

◄◄ | ◄ | Глава ⚫ | ► | ►►

¹ И обратихся и возведох очи мои и видех, и се, серп летящь.

² И рече ко мне: что ты видиши? И рех: аз вижду серп летящь, в долготу лактей двадесять и в широту десяти лактей.

³ И рече ко мне: сия клятва исходящая на лице всея земли: зане всяк тать от сего даже до смерти отмщен будет, и всяк кленыйся во лжу от сего до смерти отмстится.

⁴ И изнесу его, глаголет Господь Вседержитель, и внидет в дом татя и в дом кленущагося именем Моим во лжу, и вселится посреде дому его, и скончает его и древа его и камение его.

⁵ И изыде Ангел глаголяй во мне и рече ко мне: воззри очима твоима и виждь исходящее сие. И рех:

⁶ что есть? И рече: сия мера исходящая. И рече: сия неправда их по всей земли.

⁷ И се, талант оловян вземляйся, и се, жена едина седяше посреде меры.

⁸ И рече: сия есть беззаконие. И верже ю в средину меры и вверже камень оловяный во уста ея.

⁹ И возведох очи мои и видех, и се, две жены исходящыя, и дух в крилех их, и те имяху крила, яко криле вдодовы: и взяша меру между землею и между небом.

¹⁰ И рех ко Ангелу глаголющему во мне: камо сия относят меру?

¹¹ И рече ко мне: создати ей храмину в земли Вавилонстей и уготовати, и положат ю тамо на уготование свое.