Библия на церковно-славянском языке - транслитерация современным русским алфавитом
(1751)

Книга пророка Захарии

◄◄ | ◄ | Глава ⚫ | ► | ►►

¹ И обратися Ангел глаголяй во мне и возведе мя, якоже егда востанет человек от сна своего,

² и рече ко мне: что ты видиши? И рех: видех, и се, свещник злат весь, и светилце верху его, и седмь светилник верху его, и седмь чашиц светилником верхним его,

³ и две маслины верху его, едина одесную светилца его и едина ошуюю.

⁴ И вопросих и рех ко Ангелу глаголющему во мне глаголя: что суть сия, господи?

⁵ И отвеща Ангел глаголяй во мне и рече ко мне глаголя: не разумееши ли, что суть сия? И рех: ни, господи.

⁶ И отвеща и рече ко мне глаголя: сие слово Господне к Зоровавелю глаголя: не в силе велицей, ни в крепости, но в Дусе Моем, глаголет Господь Вседержитель.

⁷ Что ты еси, горо великая, пред лицем Зоровавеля, еже исправити? И изнесу камень наследия, равенство благодати, благодать его.

⁸ И бысть слово Господне ко мне глаголя:

⁹ руце Зоровавелевы основаша храм сей и руце его совершат его: и уразумееши, яко Господь Вседержитель посла Мя к вам:

¹⁰ зане кто укорил тя есть во дни малы? И возрадуются, и увидят камень, иже от чистаго олова, в руку Зоровавеля: седмь сия очеса Господня суть, призирающая на всю землю.

¹¹ И отвещах и рех к нему: что суть две маслины сия, яже одесную свещника и ошуюю?

¹² И вопросих вторицею и рех к нему: что суть две ветви масличны, яже в руку двух усекалниц златых возливающих и возношающих чашицы златыя?

¹³ И рече ко мне глаголя: не веси ли, что суть сия? И рех: ни, господи.

¹⁴ И рече: сии два сынове тучности, яже предстоят Господеви всея земли.