Библия на церковно-славянском языке - транслитерация современным русским алфавитом
(1751)

Книга пророка Захарии

◄◄ | ◄ | Глава ⚫ | ► | ►►

¹ В день он будет всяко место отверзаемо дому Давидову и живущым во Иерусалиме в предвижение и разделение.

² И будет в день он, глаголет Господь Саваоф, потреблю имена идолов от земли, и ктому не будет их памяти: и лживыя пророки и духа нечистаго изму от земли.

³ И будет, аще проречет человек еще, и речет к нему отец его и мати его, рождшии его, внегда пророчествовати ему: не жив будеши, яко лжу глаголал еси во имя Господне: и запнут ему отец его и мати его, родившии его, егда пророчествовати начнет.

⁴ И будет в день он, постыдятся пророцы, кийждо от видения своего, внегда пророчествовати ему, и облекутся в кожу власяную, зане солгаша.

⁵ И речет: несмь пророк аз, яко человек делаяй землю аз есмь, зане человек роди мя от юности моея.

⁶ И реку к нему: что язвы сия посреде руку твоею? И речет: имиже уязвлен бых в дому возлюбленнаго моего.

⁷ Мечу, востани на пастыря Моего и на мужа гражданина Моего, глаголет Господь Вседержитель: порази пастыря, и расточатся овцы стада: и наведу руку Мою на (малыя) пастыри.

⁸ И будет в день он на всей земли, глаголет Господь, две части ея потребятся и изчезнут, а третия останется на ней:

⁹ и проведу третию часть сквозе огнь, и разжгу я, якоже разжизается сребро, и искушу я, якоже искушается злато: той призовет имя Мое, и Аз услышу его и реку: людие Мои сии суть. И тии рекут: Господь Бог мой.