Библия на церковно-славянском языке - транслитерация современным русским алфавитом
(1751)

Книга пророка Захарии

◄◄ | ◄ | Глава ⚫ | ► | ►►

¹ Просите от Господа дождя во время ранняго и поздняго: Господь сотвори привидения, и дождь зимен даст им, комуждо злак на селе.

² Зане провещающии глаголаша труды, и вражбителие видения ложна и сония лжива глаголаху, суетными утешаху: сего ради изсхоша яко овцы, и озлоблени быша, понеже не бе изцеления.

³ На пастырей прогневася ярость Моя, и на агнцы посещу: и посетит Господь Бог Вседержитель стадо Свое, дом Иудин, и учинит я аки коня благолепна Своего во брани.

⁴ И от него призре, и от него учини, и от него лук в дусе ярости, и от него изыдет всяк изгоняяй в том.

⁵ И будут яко ратницы попирающе брение на путех во брани, и ополчатся, яко Господь с ними, и постыдятся всадницы коннии.

⁶ И укреплю дом Иудов и дом Иосифов спасу, и вселю я, понеже возлюбих я, и будут аки бы не отвратих их: зане Аз Господь Бог их и услышу я.

⁷ И будут яко ратницы Ефремовы, и возрадуется сердце их аки от вина: и чада их увидят и возвеселятся, и возрадуется сердце их о Господе.

⁸ Возвещу им и прииму я, зане искуплю их, и умножатся, якоже бяху мнози:

⁹ и всею я в людех, и дальнии помянут Мя, и воспитают чада своя, и обратятся:

¹⁰ и возвращу я от земли Египетския и от Ассириан прииму я, и в Галаадит и в Ливан введу я, и не имать остати от них ни един.

¹¹ И пройдут морем узким и поразят в мори волны, и изсякнут вся глубины речныя, и отимется всяко досаждение Ассирийско, и скиптр Египетск отимется.

¹² И укреплю я о Где Бозе их, и о имени Его восхвалятся, глаголет Господь.