Библия на церковно-славянском языке - транслитерация современным русским алфавитом
(1751)

Премудрость

◄◄ | ◄ | Глава ⚫ | ► | ►►

¹ Слышите убо, царие, и разумейте: научитеся, судии концев земли:

² внушите, содержащии множества и гордящиися о народех языков:

³ яко дана есть от Господа держава вам и сила от Вышняго, иже истяжет дела ваша и помышления испытает:

⁴ яко слузи суще царства Его не судисте право, ни сохранисте закона, ниже по воли Божией ходисте.

⁵ Страшно и скоро явится вам: яко суд жесточайший преимущым бывает,

⁶ ибо малый достоин есть милости, сильнии же сильне истязани будут.

⁷ Не щадит бо лица всех Владыка, ниже усрамится вельможи, яко мала и велика Сей сотвори, подобне же проразумевает о всех:

⁸ державным же крепко настоит испытание.

⁹ К вам убо, о, царие, словеса моя, да научитеся премудрости и не падете:

¹⁰ ибо сохраняющии преподобне преподобная преподобни будут, и иже научившиися сим, обрящут ответ.

¹¹ Возжелейте убо словес моих, возлюбите и накажитеся.

¹² Светла и не увядаема есть премудрость, и удобно видится от любящих ю, и обрящется от ищущих ю:

¹³ предваряет желающым предуведетися.

¹⁴ Утреневавый к ней не утрудится: приседящую бо обрящет при вратех своих.

¹⁵ Еже бо мыслити о ней, разума (есть) совершенство, и бдяй ея ради вскоре без печали будет:

¹⁶ яко достойных ея сама обходит ищущи, и на стезях показуется им благоприятно, и во всем провидении сретает их.

¹⁷ Начало бо ея истиннейшее наказания возжеление,

¹⁸ попечение же наказания любы, любы же хранение законов ея,

¹⁹ хранение же законов утверждение нерастления (есть), нерастление же творит близ быти Бога:

²⁰ возжеление убо премудрости возводит к царству (вечному).

²¹ Аще убо наслаждаетеся престолами и скиптры, о, царие людий, почтите премудрость, да во веки царствуете.

²² Что же есть премудрость, и како бысть, возвещу,

²³ и не утаю от вас таин, но от начала рождения изслежду,

²⁴ и положу на свет разум ея и не преминую истины,

²⁵ ниже завистию тающему спутьствую, яко сей не будет причастник премудрости.

²⁶ Множество же премудрых спасение миру, и царь премудр утверждение людем.

²⁷ Сего ради приимите наказание по словесем моим, и полезно будет вам.