Библия на церковно-славянском языке - транслитерация современным русским алфавитом
(1751)

Премудрость

◄◄ | ◄ | Глава ⚫ | ► | ►►

¹ Нечестивым же до конца без милости ярость найде: предведе бо их и будущая,

² яко тии отпустившии, еже отити, и со тщанием предпославше их, поженут вслед раскаявшеся:

³ еще бо в руках имеюще рыдания и сетующе над гробами мертвых, ин себе взяша помысл безумия, и ихже моляще изгнаша, сих аки беглецев гоняху.

⁴ Влечаше бо их к сему концу достойная нужда, и приключшихся забытие вложи, да и прочую к мучением принаполнят казнь:

⁵ и людие убо Твои преславное путьшествие прейдут, они же странну обрящут смерть.

⁶ Все бо творение во своем ему роде паки свыше преобразовашеся, служащее свойственным Твоим повелением, да отроцы Твои сохранятся невреждени.

⁷ Облак осеняяй полк их, и из преждебывшия воды открытие сухия земли явися, и из моря Чермнаго путь невозбранен, и поле злачное от волнения зелнаго:

⁸ имже весь язык пройде, Твоею рукою покровени, видяще дивная чудеса.

⁹ Якоже бо кони насытишася, и яко агнцы взыграшася, хваляще Тя, Господи, избавльшаго их:

¹⁰ воспомянуша бо еще, яже во обитании их, како убо вместо рождения животных изведе земля скнипы, вместо же рыб изрыгну река множество жаб.

¹¹ Последи же видеша и новое рождение птиц, егда похотением подвигшеся, просиша сладостныя пищи.

¹² Во утешение бо взыдоша им от моря крастели: и мучения грешным наидоша, не без бывших знамений силою молний: праведне бо пострадаша за своя злобы,

¹³ ибо лютейшее ненавидение странных совершиша: инии убо незнаемых не приемляху пришелцев, сии же благодетелей странных порабощаху.

¹⁴ И не токмо, но аще кое разсмотрение будет их: зане враждебно приемляху чуждых.

¹⁵ Сии же с празднествами приемше приобщившихся уже их обычаем, жесточайшими озлобиша трудами.

¹⁶ Побиени же быша и ослеплением, якоже онии при дверех праведника, егда великою обложени тмою, кийждо своих дверий прохода искаше.

¹⁷ Сами бо собою стихии пременяемы, якоже в гуслех гласы сличия имя пременяют, всегда храняще звук: еже есть видети от зрака бывших известно.

¹⁸ Земная бо в водная прелагахуся, и плавающая прехождаху на землю.

¹⁹ Огнь возмогаше в воде вышше своея силы, и вода угашающую силу забы.

²⁰ Пламень вопреки удоботленных животных не вреди плотей в нем ходящих, ниже таяше ледовидный удоботаяй род сладостныя пищи.

²¹ По всему бо, Господи, возвеличил еси люди Твоя и прославил еси, и не презрел еси, во всяцем времени и месте предстояй.