Библия на церковно-славянском языке - транслитерация современным русским алфавитом
(1751)

Премудрость

◄◄ | ◄ | Глава ⚫ | ► | ►►

¹ Велицы бо суть суди Твои, (Господи,) и неизглаголанни: сего ради ненаказанныя души заблудиша.

² Возмневше бо насильствовати язык святый беззаконнии, узницы тмы и долгою нощию связани, заключени под кровы, беглецы вечнаго Проведения лежаша.

³ Утаитися бо мняще в сокровенных гресех, мрачным забвения покрывалом расточени быша, ужасающеся люте и страшилищами возмущени:

⁴ ниже бо содержай их вертеп без страха сохрани, шумы же сходяще возмущаху их, и привидения дряхлая печальными лицами являхуся.

⁵ И огненная убо ни едина сила можаше освещати, ниже звезд светлии пламение просветити можаху в ту нощь страшную.

⁶ Являшеся же им токмо внезапный огнь страха исполнь: устрашаеми же невидимым оным призраком, мняху горшая быти видимая.

⁷ Волшебнаго же художества предлежаху посмеяния, и о премудрости величания обличение укоризненно:

⁸ обещающиися бо изгнати страхи и смущения от души болящия, сии посмеятелным страхом боляху.

⁹ Ибо аще и ничтоже их мятежное устрашаше, зверей преходами и змиев звизданьми подвижени погибаху трепетни, и аера отнюд неизбежнаго отрицающеся видети.

¹⁰ Боязливая бо злоба, своим свидетелством осуждаема, выну приемлет во ум лютая, содержима совестию.

¹¹ Ничтоже бо есть страх, токмо лишение помощей сущих от помышления.

¹² Внутрь же менше сущее чаяние, болшее мнит неведение вины подающия муку.

¹³ А иже в немощную поистинне нощь, и от немощнаго ада вертепов нашедшую, сном темже спящии,

¹⁴ ово убо страшилищами мечтаний гоними бяху, ово же души изчезаху преданием: внезапный бо им и нечаянный страх найде.

¹⁵ Потом тако, кто либо когда бе онамо, низпадый храняшеся в темнице без железа заключен:

¹⁶ аще бо земледелатель кто бысть, или пастырь, или трудов пустынных делатель, предят быв, неизбежную терпяше нужду:

¹⁷ единым бо ужем тмы вси бяху связани. Аще дух звиздаяй, или между частых древесных ветвей птичий глас сладкопеснивый, или сила водная текущи зелне,

¹⁸ или шум зелный низпадающих камений, или играющих животных течение невидимое, или рыкающих лютых зверей глас, или отзывающься от дебрей горских глас, разслабляху оных устрашающе.

¹⁹ Вся бо вселенная светлым просвещашеся светом, и невозбранными делы содержашеся:

²⁰ на единых же оных простирашеся тяжкая нощь, образ будущаго их восприятия тмы: сами же себе быша тмы тяжчайшии.