Библия на церковно-славянском языке - транслитерация современным русским алфавитом
(1751)

Премудрость

◄◄ | ◄ | Глава ⚫ | ► | ►►

¹ Ты же Бог наш благ и истинен, долготерпелив и в милости управляяй вся.

² Ибо аще согрешим, Твои есмы, ведуще державу Твою: и аще не согрешим, вемы, яко Тебе вменихомся.

³ Еже бо знати Тебе, всесовершена (есть) правда, и ведети державу Твою, корень есть безсмертия.

⁴ Ниже бо прельсти нас человеческое злохитрое умышление, ниже сеннописаных труд безплодный, вид изваян различными шары,

⁵ ихже зрак безумным приходит в похотение, и любят мертваго образа вид бездушный.

⁶ Злых любителие достойнии таковых надежд и творящии, и любящии, и чествующии.

⁷ Ибо скудельник, мягкую землю мнущь со трудом, делает ко служению нашему коеждо: но от тогожде брения созда и яже чистых дел служебныя сосуды, и сопротивныя, вся подобне: сих же обоих коегождо есть употребление, судия есть бреноделатель.

⁸ И злотрудник бога суетна от тогожде творит брения, иже мало прежде от земли сотворен быв, по мале идет, из неяже взят бысть, истязан о душевнем долзе.

⁹ Но есть ему прилежание, не яко имать трудитися, ниже яко краткоконечно житие имать: но ревнует златоделателем и сребролиятелем, и меди делателем подражает, и славу мнит, яко скверная делает.

¹⁰ Пепел бо есть сердце его, и земли хуждше упование его, и брения безчестнее живот его:

¹¹ яко не уведе Создавшаго его, и вдохнувшаго ему душу действительную, и вдунувшаго дух животный.

¹² Но вмениша игралище быти живот наш, и житие все упражнено на приобретение: ибо глаголют, яко подобает откуду либо, аще и от зла, приобретати.

¹³ Сей бо паче всех весть, яко согрешает, от вещества земленаго удобныя к сокрушению сосуды и изваяния содеваяй.

¹⁴ Вси же пребезумнейшии и окаяннейшии, паче души младенческия, врази людий Твоих обладавшии ими:

¹⁵ яко вся идолы язычески вмениша в боги, имже ниже очес употребление ко зрению, ниже ноздри в привлечение аера, ниже уши слышати, ниже персты рук во осязание, и ноги их праздны ко хождению.

¹⁶ Человек бо сотвори их, и духа взаим взяв созда их: ни един бо человек может себе подобна бога создати:

¹⁷ смертен же сый мертва делает рукама беззаконныма: лучший бо есть идолов своих: (яко) сей убо поживе, онии же никогда.

¹⁸ И животных мерзких чтут: безумная бо сравняемая иных суть хуждша.

¹⁹ Ниже елико вожделети яко в лицы животных блага суть, отбегоша же и Божия хвалы и благословения Его.