Библия на церковно-славянском языке - транслитерация современным русским алфавитом
(1751)

Премудрость

◄◄ | ◄ | Глава ⚫ | ► | ►►

¹ Управи дела их рукою пророка святаго:

² проидоша пустыню необитанную и в непроходимых водрузиша кущы,

³ сопротивишася супостатом и отмстиша врагом:

⁴ возжадаша и призваша Тебе, и дана бысть им вода от камене несекомаго и изцеление жажды от камене жестока.

⁵ Имиже бо наказани быша врази их,

⁶ сими сии во оскудении суще благодетелствовани быша:

⁷ за источник убо приснотекущия реки, кровию излиянною смятенныя,

⁸ во обличение младенцеубийственнаго повеления, дал еси им изюбилну воду безнадежно,

⁹ показав тогда жаждею, како противных умучил еси.

¹⁰ Егда бо искушени быша и в милости наказани, познаша, како во гневе судимии нечестивии мучишася:

¹¹ сих бо яко отец учащь искусил еси, онех же яко жесток царь осуждая истязал еси.

¹² Отстоящии же и присутствующии такожде мучишася:

¹³ сугуба бо их прият печаль и стенание с памятию минувших.

¹⁴ Егда бо слышаху своими мучении благодействуемых оных, познаваху Господа:

¹⁵ егоже бо древле во отложении отвержена отрекошася смеющеся, при концы события удивишася, неподобною праведным томими жаждею.

¹⁶ За помышления же безумная неправды их, в нихже заблудивше почитаху безсловесная пресмыкающаяся и зверей худых, послал еси им множество безсловесных животных во отмщение,

¹⁷ да познают, яко имиже кто согрешает, сими и мучится.

¹⁸ Не неможаше бо всесильная рука Твоя, яже сотвори мир от безобразнаго вещества, послати на них множество медведей, или лютых львов,

¹⁹ или новосозданных ярости исполненых зверей незнаемых, или огненным дышущих духом, или злосмрадный произносящих дым, или страшныя из очей искры испускающих:

²⁰ ихже не токмо вред можаше истребити я, но и зрак устрашающь погубити.

²¹ И без тех, единым духом пасти могоша, от суда гоними и развеяни от духа силы Твоея: но вся мерою и числом и весом расположил еси.

²² Еже бо много мощи, присутствует Тебе всегда, и державе мышцы Твоея кто сопротивится?

²³ Понеже, якоже стражик в превесех, (тако) весь мир пред Тобою, и яко капля росы утренния, сходящия на землю.

²⁴ Милуеши же всех, яко вся можеши, и презираеши грехи человеком в покаяние.

²⁵ Любиши же сущая вся, и ни чесогоже гнушаешися, яже сотворил еси: ниже бо ненавидя что устроил еси.

²⁶ Како же пребыло бы что, аще бы Ты не изволил еси? Или, еже не наречено от Тебе, сохранилося бы?

²⁷ Щадиши же вся, яко Твоя суть, Владыко душелюбче!