Библия на церковно-славянском языке - транслитерация современным русским алфавитом
(1751)

Книга Товита

◄◄ | ◄ | Глава ⚫ | ► | ►►

¹ Егда же окончаша вечерю, введоша Товию к ней.

² Он же идый помяну словеса Рафаилова, и взя жераток фимиамный, и возложи сердце рыбие и печень, и покури:

³ егда же обоня демон воню, отбеже в вышняя Египта, и связа его Ангел.

⁴ Егда же заключена быста оба, воста Товиа от ложа и рече: востани, сестро, и помолимся, да помилует ны Господь.

⁵ И нача Товиа глаголати: благословен еси, Боже отец наших, и благословено имя Твое святое и славное во веки, да благословят Тя небеса и вся создания Твоя:

⁶ Ты сотворил еси Адама и дал еси ему помощницу Еву утверждение жену его: от тех родися человеческое семя: Ты рекл еси: не добро быти человеку единому, сотворим ему помощницу подобную ему:

⁷ и ныне, Господи, не блудодеяния ради аз поемлю сестру мою сию, но по истине: повели помиловану ми быти и с нею состаретися.

⁸ И рече с ним: аминь.

⁹ И спаста оба нощию, и востав Рагуил пойде и ископа гроб, глаголя:

¹⁰ еда и той умре?

¹¹ И прииде Рагуил в дом свой

¹² и рече Едне жене своей: посли едину от рабынь, и да видит, аще жив есть: аще же ни, да погребем его, и да никтоже увесть.

¹³ И вниде рабыня отверзши дверь, и обрете обоих спящих,

¹⁴ и изшедши возвести им, яко жив есть.

¹⁵ И благослови Рагуил Бога, глаголя: благословен еси Ты, Боже, во всяцем благословении чистем и святем: и да благословят Тя святии Твои и вся создания Твоя, и вси Ангели Твои и избранни Твои: да благословят Тя во веки:

¹⁶ благословен еси, яко возвеселил мя еси, и не бысть ми, якоже непщевах, но по мнозей милости Твоей сотворил еси с нами:

¹⁷ благословен еси, яко помиловал еси двоих единородных: сотвори има, Владыко, милость, соверши живот их во здравии с веселием и милостию.

¹⁸ Повеле же рабом засыпати гроб,

¹⁹ и сотвори им брак дний четыренадесять,

²⁰ и рече ему Рагуил, прежде даже совершитися днем брака, с клятвою, да не изыдет, аще не исполнятся четыренадесять дние брака:

²¹ и тогда взем пол имений своих да пойдет со здравием ко отцу: прочая же, егда умру и жена моя.