Библия на церковно-славянском языке - транслитерация современным русским алфавитом
(1751)

Первое послание апостола Павла Тимофею

◄◄ | ◄ | Глава ⚫ | ► | ►►

¹ Елицы суть под игом раби, своих господий всякия чести да сподобляют, да имя Божие не хулится и учение.

² Имущии же верных господий да не нерадят о них, понеже братия суть: но паче да работают, зане верни суть и возлюблени, иже благодать восприемлющии. Сия учи и моли.

³ Аще ли кто инако учит и не приступает к здравым словесем Господа нашего Иисуса Христа и учению, еже по благоверию,

⁴ разгордеся, ничтоже ведый, но недугуяй о стязаниих и словопрениих, от нихже бывает зависть, рвение, хулы, непщевания лукава,

⁵ беседы злыя растленных человеков умом и лишенных истины, непщующих приобретение быти благочестие. Отступай от таковых.

⁶ Есть же снискание велие благочестие с доволством.

⁷ Ничтоже бо внесохом в мир сей: яве, яко ниже изнести что можем.

⁸ Имеюще же пищу и одеяние, сими доволни будем.

⁹ А хотящии богатитися впадают в напасти и сеть, и в похоти многи несмысленны и вреждающыя, яже погружают человеки во всегубителство и погибель:

¹⁰ корень бо всем злым сребролюбие есть, егоже нецыи желающе заблудиша от веры, и себе пригвоздиша болезнем многим.

¹¹ Ты же, о, человече Божий, сих бегай: гони же правду, благочестие, веру, любовь, терпение, кротость:

¹² подвизайся добрым подвигом веры, емлися за вечную жизнь, в нюже и зван был еси, и исповедал еси доброе исповедание пред многими свидетели.

¹³ Завещаваю ти пред Богом оживляющим всяческая, и Христом Иисусом свидетелствовавшим при Понтийстем Пилате доброе исповедание:

¹⁴ соблюсти тебе заповедь нескверну и незазорну, даже до явления Господа нашего Иисуса Христа,

¹⁵ еже во своя времена явит блаженный и един сильный, Царь царствующих и Господь господствующих,

¹⁶ един имеяй безсмертие и во свете живый неприступнем, Егоже никтоже видел есть от человек, ниже видети может: емуже честь и держава вечная. Аминь.

¹⁷ Богатым в нынешнем веце запрещай не высокомудрствовати, ниже уповати на богатство погибающее, но на Бога жива, дающаго нам вся обилно в наслаждение:

¹⁸ благое делати, богатитися в делех добрых, благоподатливым быти, общителным,

¹⁹ сокровищующе себе основание добро в будущее, да приимут вечную жизнь.

²⁰ О, Тимофее, предание сохрани, уклоняяся скверных суесловий и прекословий лжеименнаго разума:

²¹ о немже нецыи хвалящеся, о вере погрешиша. Благодать с тобою. Аминь.