Библия на церковно-славянском языке - транслитерация современным русским алфавитом
(1751)

Первое послание апостола Павла Тимофею

◄◄ | ◄ | Глава ⚫ | ► | ►►

¹ Старцу не твори пакости, но утешай якоже отца: юношы, якоже братию:

² старицы, якоже матери: юныя, якоже сестры, со всякою чистотою.

³ Вдовицы чти сущыя истинныя вдовицы.

⁴ Аще же кая вдовица чада или внучата имать, да учатся прежде свой дом благочестиво устроити и взаем воздаяти родителем: сие бо есть благоугодно пред Богом.

⁵ А сущая истинная вдовица и уединена, уповает на Бога и пребывает в молитвах и молениих день и нощь:

⁶ питающаяся же пространно, жива умерла.

⁷ И сия завещавай, да непорочни будут.

⁸ Аще же кто о своих, паче же о присных не промышляет, веры отверглся есть и невернаго горший есть.

⁹ Вдовица же да причитается не менши лет шестидесятих, бывши единому мужу жена,

¹⁰ в делех добрых свидетелствуема, аще чада воспитала есть, аще святых нозе умы, аще странныя прият, аще скорбным утешение бысть, аще всякому делу благу последовала есть.

¹¹ Юных же вдовиц отрицайся: егда бо разсвирепеют о Христе, посягати хотят,

¹² имущыя грех, яко первыя веры отвергошася:

¹³ купно же и праздны учатся обходити домы, не точию же праздны, но и блядивы и оплазивы, глаголющыя, яже не подобает.

¹⁴ Хощу убо юным вдовицам посягати, чада раждати, дом строити, ни едины же вины даяти противному хулы ради:

¹⁵ се бо некия развратишася вслед сатаны.

¹⁶ Аще кто верен или верна имать вдовицы, да довлит их, и да не тяготится Церковь, да сущих истинных вдовиц удоволит.

¹⁷ Прилежащии же добре пресвитери сугубыя чести да сподобляются: паче же труждающиися в слове и учении.

¹⁸ Глаголет бо Писание: вола молотяща не обротиши: и: достоин делатель мзды своея.

¹⁹ На пресвитера хулы не приемли, разве при двою или триех свидетелех.

²⁰ Согрешающих же пред всеми обличай, да и прочии страх имут.

²¹ Засвидетелствую пред Богом, и Господем Иисус Христом, и избранными (его) Ангелы, да сия сохраниши без лицемерия, ничесоже творя по уклонению.

²² Руки скоро не возлагай ни на когоже, ниже приобщайся чужым грехом: себе чиста соблюдай.

²³ Ктому не пий воды, но мало вина приемли, стомаха ради твоего и частых твоих недугов.

²⁴ Неких (же) человек греси предявлени суть, предваряюще на суд: неким же и последствуют.

²⁵ Такожде и добрая дела предявлена суть: и сущая инако, утаитися не могут.