Бiблiя беларуская - пераклад Василя Сёмухи
(1995, Минск)

1-е Цiмафея

◄◄ | ◄ | Глава ⚫ | ► | ►►

¹ І вось, перш-наперш прашу ўзносіць малітвы, прашэньні, маленьні, падзякаваньні за ўсіх людзей,

² за цароў і за ўсіх уладцаў, каб нам весьці жыцьцё ціхае і маўклівае ў богабаязнай пабожнасьці і чысьціні;

³ бо гэта добра і даспадобы Збаўцу нашаму Богу,

⁴ Які хоча, каб усе людзі ўратаваліся і дасягнулі спазнаньня ісьціны.

⁵ Бо адзіны Бог, адзіны і пасрэднік паміж Богам і людзьмі, Чалавек Хрыстос Ісус,

⁶ Які аддаў Сябе на адкупленьне ўсіх: такое было ў свой час сьведчаньне,

⁷ дзеля якога я пастаўлены прапаведнікам і апосталам - праўду кажу ў Хрысьце, не маню, - настаўнікам язычнікаў у веры і праўдзе.

⁸ І вось жадаю, каб на ўсякім месцы казалі малітвы мужчыны, узносячы чыстыя рукі бяз гневу і сумненьня;

⁹ каб гэтак сама і жанчыны, у прыстойнай вопратцы, сарамяжліва і цнатліва, упрыгожвалі сябе не заплятаньнем валасоў, ні золатам, ні жэмчугам, ні каляровымі строямі,

¹⁰ а добрымі справамі, як прыстойна жанчынам, што прысьвячаюць сябе пабожнасьці.

¹¹ Жанчына хай вучыцца маўкліва, у вялікай пакоры;

¹² а вучыць жанчыне не дазваляю, ні верхаводзіць над мужчынам, а быць у маўклівасьці.

¹³ Бо раней створаны Адам, а потым Ева;

¹⁴ і не Адам зваблены, а жонка, звабіўшыся, пераступіла закон;

¹⁵ аднак жа ўратуецца празь дзетародства, калі застанецца ў веры і любові і ў сьвятасьці з цнотаю.