Перевод блаженного Иеронима Стридонского книг Священного Писания на латынь - Vulgata (Вульгата)
(386-405)

Epistula II ad Thessalonicenses

◄◄ | ◄ | Глава ⚫ | ► | ►►

¹ ut clarificetur nomen Domini nostri Iesu Christi in vobis et vos in illo secundum gratiam Dei nostri et Domini Iesu Christi

² rogamus autem vos fratres per adventum Domini nostri Iesu Christi et nostrae congregationis in ipsum

³ ut non cito moveamini a sensu neque terreamini neque per spiritum neque per sermonem neque per epistulam tamquam per nos quasi instet dies Domini

⁴ ne quis vos seducat ullo modo quoniam nisi venerit discessio primum et revelatus fuerit homo peccati filius perditionis

⁵ qui adversatur et extollitur supra omne quod dicitur Deus aut quod colitur ita ut in templo Dei sedeat ostendens se quia sit Deus

⁶ non retinetis quod cum adhuc essem apud vos haec dicebam vobis

⁷ et nunc quid detineat scitis ut reveletur in suo tempore

⁸ nam mysterium iam operatur iniquitatis tantum ut qui tenet nunc donec de medio fiat

⁹ et tunc revelabitur ille iniquus quem Dominus Iesus interficiet spiritu oris sui et destruet inlustratione adventus sui

¹⁰ eum cuius est adventus secundum operationem Satanae in omni virtute et signis et prodigiis mendacibus

¹¹ et in omni seductione iniquitatis his qui pereunt eo quod caritatem veritatis non receperunt ut salvi fierent

¹² ideo mittit illis Deus operationem erroris ut credant mendacio

¹³ ut iudicentur omnes qui non crediderunt veritati sed consenserunt iniquitati

¹⁴ nos autem debemus gratias agere Deo semper pro vobis fratres dilecti a Deo quod elegerit nos Deus primitias in salutem in sanctificatione Spiritus et fide veritatis

¹⁵ ad quod et vocavit vos per evangelium nostrum in adquisitionem gloriae Domini nostri Iesu Christi

¹⁶ itaque fratres state et tenete traditiones quas didicistis sive per sermonem sive per epistulam nostram

¹⁷ ipse autem Dominus noster Iesus Christus et Deus et Pater noster qui dilexit nos et dedit consolationem aeternam et spem bonam in gratia

¹⁸ exhortetur corda vestra et confirmet in omni opere et sermone bono