Бiблiя беларуская - пераклад Василя Сёмухи
(1995, Минск)

1-е Фесаланiкiйцаў

◄◄ | ◄ | Глава ⚫ | ► | ►►

¹ За гэтым, браты, просім і молім вас Ісусам Хрыстом, каб вы, прыняўшы ад нас, як трэба вам паводзіцца і дагаджаць Богу, у гэтым яшчэ большы посьпех займелі,

² бо вы ведаеце, якія мы далі вам запаведзі ад Госпада Ісуса.

³ Бо воля Божая ёсьць асьвячэньне вашае, каб вы ўстрымліваліся ад распусты;

⁴ каб кожны з вас умеў захоўваць свой сасуд у сьвятасьці і гонары,

⁵ а не ў запале пахацінства, як язычнікі, што ня ведаюць Бога;

⁶ каб вы ні ў чым не паводзіліся з братам сваім супрацьзаконна і карысьліва: бо Гасподзь - мсьцівец за ўсё гэта, як і раней мы казалі вам і сьведчылі.

⁷ Бо паклікаў нас Бог не да нячысьціні, а да сьвятасьці.

⁸ А таму непакорлівы ёсьць непакорны не чалавеку, а Богу, Які і даў нам Духа Свайго Сьвятога.

⁹ Пра браталюбства ж няма патрэбы пісаць вам, бо вы самі навучаны Богам любіць адно аднаго,

¹⁰ бо вы так і робіце з усімі братамі па ўсёй Македоніі. Молім вас, браты, яшчэ болей старацца

¹¹ і рупліва дбаць пра тое, каб жыць ціхмяна, рабіць сваю справу і працаваць сваімі рукамі, як мы наказвалі вам;

¹² каб вы паводзіліся прыстойна перад чужымі і ні ў чым патрэбы ня мелі.

¹³ Не хачу, браты, пакінуць вас у няведаньні пра памерлых, каб вы не маркоціліся, як іншыя, што ня маюць надзеі.

¹⁴ Бо калі мы верым, што Ісус памёр і ўваскрэс, дык і памерлых у Ісусе Бог прывядзе зь Ім.

¹⁵ Бо гэта кажам вам словам Гасподнім, што мы, жывыя, што засталіся да прышэсьця Гасподняга, не папярэдзім памерлых;

¹⁶ бо Сам Гасподзь пры абвяшчэньні, пры голасе арханёла і трубе Божай, сыдзе зь неба, і мёртвыя ў Хрысьце ўваскрэснуць раней;

¹⁷ потым мы, хто застанецца жывы, разам зь імі ўзятыя будзем на воблакі на сустрэчу з Госпадам у паветры, і так вечна з Госпадам будзем.

¹⁸ Дык вось, суцяшайце адно аднаго гэтымі словамі.