Библия на церковно-славянском языке - транслитерация современным русским алфавитом
(1751)

Песнь песней

◄◄ | ◄ | Глава ⚫ | ► | ►►

¹ Се, еси добра, ближняя моя, се, еси добра: очи твои голубине, кроме замолчания твоего: власи твои яко стада козиц, яже открышася от Галаада.

² Зубы твои яко стада остриженых, яже изыдоша из купели, вся двоеплодны, и неродящия несть в них.

³ Яко вервь червлена устне твои, и беседа твоя красна: яко оброщение шипка ланиты твоя, кроме замолчания твоего.

⁴ Яко столп Давидов выя твоя, создан в Фалпиофе: тысяща щитов висит на нем, вся стрелы сильных.

⁵ Два сосца твоя яко два млада близнца серны, пасомая во кринах,

⁶ дондеже дхнет день, и подвигнутся сени. Пойду себе к горе смирней и к холму ливанску.

⁷ Вся добра еси, ближняя моя, и порока несть в тебе.

⁸ Гряди от Ливана, невесто, гряди от Ливана: прииди и прейди из начала Веры, от главы Санира и Аермона, от оград львовых, от гор пардалеов.

⁹ Сердце наше привлекла еси, сестро моя невесто, сердце наше привлекла еси единым от очию твоею, единым монистом выи твоея.

¹⁰ Что удобреста сосца твоя, сестро моя невесто? Что удобреста сосца твоя паче вина, и воня риз твоих паче всех аромат?

¹¹ Сот искапают устне твои, невесто, мед и млеко под языком твоим, и благовоние риз твоих яко благоухание Ливана.

¹² Вертоград заключен сестра моя невеста, вертоград заключен, источник запечатлен.

¹³ Леторасли твоя сад шипков с плодом яблочным, кипри с нардами,

¹⁴ нард и шафран, трость и киннамон со всеми древами ливанскими, смирна, алой со всеми первыми мирами,

¹⁵ источник вертограда, и кладязь воды живы и истекающия от Ливана.

¹⁶ Востани, севере, и гряди, юже, и повей во вертограде моем, и да потекут ароматы мои.