Библия на церковно-славянском языке - транслитерация современным русским алфавитом
(1751)

Книга Сираха

◄◄ | ◄ | Глава ⚫ | ► | ►►

¹ Не сварися с человеком сильным, и да не когда впадеши в руце его.

² Не тяжися с человеком богатым, да не когда отяготит ти меру:

³ многих бо погуби злато, и сердца царская преклони.

⁴ Не сварися с человеком язычным и не накладай на огнь его дров.

⁵ Не играй с ненаказанным, да не приимут безчестия прародителие твои.

⁶ Не поноси человеку обращающуся от греха: помяни, яко вси есмы во епитимиах.

⁷ Не безчести человека в старости его: ибо и ты сам состареешися.

⁸ Не радуйся о мертвеце бывшем враждебнейшем тебе: помяни, яко вси умираем.

⁹ Не презри повести премудрых и в притчах их живи:

¹⁰ яко от них навыкнеши наказанию и служити вельможам удобно.

¹¹ Не отступай от повести старцев: ибо тии навыкоша от отец своих:

¹² яко от них навыкнеши разуму и во время потребно дати ответ.

¹³ Не возгнещай углия грешнику, да не сгориши огнем пламене его.

¹⁴ Не востани на лице досадителево, да не приседит яко наветник устом твоим.

¹⁵ Взаим не дай человеку крепльшу тебе, и аще даси, буди якоже погубивый.

¹⁶ Не поручайся выше силы твоея: и аще поручишися, яко воздаяй пецыся.

¹⁷ Не сварися со судиею: по разсуждению бо его будут судити ему.

¹⁸ С дерзым не ходи на путь, яко да не отяготится на тя: той бо сотворит по воли своей, и с буйством его погибнеши.

¹⁹ С яростивым не сварися и не иди с ним сквозе пустыню: пред очима бо его кровь яко ничтоже есть, и идеже несть помощи, тамо низложит тя.

²⁰ С буим совета не твори: не возможет бо слова удержати.

²¹ Пред чужим не твори тайнаго: не веси бо, что родит ти.

²² Всякому человеку не являй сердца твоего, да не воздаст ти благодати ложныя.