Библия на церковно-славянском языке - транслитерация современным русским алфавитом
(1751)

Книга Сираха

◄◄ | ◄ | Глава ⚫ | ► | ►►

¹ Крепок на бранех Иисус Навин и преемник Моисеов бысть во пророчестве:

² иже бысть по имени своему велик на спасение избранных его, мстити востающым (нань) врагом, яко да наследствит Израиля.

³ Коль прославлен бысть воздвижением рук своих, и внегда простираше мечь на грады.

⁴ Кто прежде его сице ста? Брани бо Господни той вождаше.

⁵ Не рукою ли его воспятися солнце, и един день бысть яко два?

⁶ Призва Вышняго Сильна, егда оскорбляху его врази окрест, и послуша его велий Господь: камением градным силы крепкия

⁷ устреми брань на языки, исхождением погуби противники,

⁸ да познают языцы всеюружие его, яко пред Господем брань его: ибо последова Могутному.

⁹ И во дни Моисеовы сотвори милость сей и Халев сын Иефонниин, стати противу врага, удержати люди от грех и утолити ропот лукавства:

¹⁰ и та два суща спасена быста от шести сот тысящ пешцев, ввести их в наследствие, в землю точащую млеко и мед.

¹¹ И даде Господь Халеву крепость, и даже до старости пребысть у него, взыти ему на высоту земли, и семя его обдержа наследие:

¹² яко да видят вси сынове Израилевы, яко добро ходити вслед Господа.

¹³ И судии кийждо именем своим, еликих не любодействова сердце, и елицы не отвратишася от Господа, и память их во благословениих:

¹⁴ кости их да процветут от места их,

¹⁵ и имя их пременяемо на сынех, прославленным бывшым им.

¹⁶ Возлюблен Господем своим Самуил пророк Господень устрои царство и помаза князи над людьми его:

¹⁷ законом Господним суди сонму, и посети Господь Иакова:

¹⁸ верою своею испытан бысть пророк, и познан бысть в вере своей верен видением.

¹⁹ И призва Господа Сильна, егда оскорбляху его врази его окрест, приношением агнца ссущаго млеко:

²⁰ и возгреме с небесе Господь и гласом велиим услышан сотвори глас Свой:

²¹ и потреби Владыки Тирския, и вся князи Филистимския.

²² И прежде времене успения века свидетелствова пред Господем и христом Его: имения и до сапог от всякия плоти не взях: и не сотвори ему поношения (ни един) человек.

²³ И по успении своем пророчествова и показа цареви кончину его: и вознесе от земли глас свой, пророчеством истребити беззаконие людий.