Библия на церковно-славянском языке - транслитерация современным русским алфавитом
(1751)

Книга Сираха

◄◄ | ◄ | Глава ⚫ | ► | ►►

¹ Чадо, живота нищаго не лиши и не отвращай очес от просящаго,

² души алчущия не оскорби и не разгневай мужа в нищете его,

³ сердца раздраженаго не превозмути и не продолжай даяния требующему,

⁴ раба скорбяща не отрей и не отврати лица твоего от нищаго,

⁵ от требующаго не отврати очес и не даждь места человеку кляти тя:

⁶ кленущаго бо тя в горести души своея мольбу услышит Сотворивый его.

⁷ Приятна соборищу твори себе и князю смиряй главу твою,

⁸ приклони ухо твое к нищему и отвещай ему мирная в кротости,

⁹ изми обидимаго из руки обидящаго и не малодушествуй, егда судиши,

¹⁰ буди сирым яко отец и вместо мужа матери их:

¹¹ и будеши яко сын Вышняго, и возлюбит тя паче неже мати твоя.

¹² Премудрость сыны своя вознесе и заступает ищущих ея:

¹³ любяй ю любит жизнь, и утренюющии к ней исполнятся веселия:

¹⁴ держайся ея наследит славу, и идеже входит, благословит его Господь:

¹⁵ служащии ей послужат Святому, и любящих ю любит Господь:

¹⁶ слушаяй ея судити имать языки, и внимаяй ей вселится надеявся.

¹⁷ Аще уверуеши, наследиши ю, и во одержании будут роды его:

¹⁸ яко стропотно ходит с ним в первых, боязнь же и страх наведет нань

¹⁹ и помучит его в наказании своем, дондеже веру имет души его и искусит его во оправданиих своих,

²⁰ и паки возвратится прямо к нему и возвеселит его

²¹ и открыет ему тайны своя:

²² аще заблудит, оставит его и предаст его в руце падения его.

²³ Блюди время и хранися от лукаваго,

²⁴ и о души твоей не постыдися:

²⁵ есть бо стыд наводяй грех, и есть стыд слава и благодать.

²⁶ Не приими лица на душу твою и не срамляйся о падении твоем.

²⁷ Не возбрани словесе во время спасения:

²⁸ в словеси бо познана будет премудрость, и наказание в глаголех языка.

²⁹ Не пререкай противу истины и о ненаказании твоем срамляйся:

³⁰ не стыдися исповедати грехи твоя и не воспящай быстрины речныя.

³¹ И не подстелися мужу бую и не обинися лица сильнаго.

³² Даже до смерти подвизайся о истине, и Господь Бог поборет по тебе.

³³ Не буди скор языком твоим, ленив же и слаб в делех твоих.

³⁴ Не буди яко лев в дому твоем и жестоконеистов в рабех твоих.

³⁵ Не буди рука твоя простерта на взятие, а на отдаяние согбена.