Библия на церковно-славянском языке - транслитерация современным русским алфавитом
(1751)

Книга Сираха

◄◄ | ◄ | Глава ⚫ | ► | ►►

¹ Аще добро твориши, разумей, кому твориши, и будет благодать благим твоим.

² Добро сотвори благочестивому, и обрящеши воздаяние, и аще не от него, то от Вышняго.

³ Не будет добро прилежащему во злых и не подающему милостыни.

⁴ Даждь благочестивому и не заступай грешника.

⁵ Добро сотвори смиренному и не даждь нечестивому: возбрани хлебы твоя и не даждь ему, да не теми тя преможет:

⁶ сугуба бо зла обрящеши во всех благих, яже аще сотвориши ему: яко и Вышний возненавиде грешники и нечестивым воздаст месть.

⁷ Даждь благому и не заступай грешника.

⁸ Не познан будет во благих друг и не скрыется во злых враг.

⁹ Егда во благих будет муж, врази его во печали суть, во злых же его и друг разлучится.

¹⁰ Не ими веры врагу твоему во веки: якоже бо медь ржавеет, тако и злоба его:

¹¹ и аще смирится и пойдет поникнув, настави душу твою и хранися от него, и будеши ему яко очищено зерцало, и уразумееши, яко не до конца оторжаве:

¹² не постави его при себе, да не когда изринув тя станет на месте твоем: не посади его одесную себе, да не поищет когда седалища твоего, и на последок уразумееши словеса моя и о глаголех моих умилишися.

¹³ Кто помилует обаянника змием усекнена и всех приступающих ко зверем? Такожде ходящаго с мужем грешником и примешающагося грехом его:

¹⁴ час с тобою пребудет, и аще уклонишися, не стерпит.

¹⁵ Устнама своима усладит враг, и много пошепчет и речет добро глаголя: очима своима прослезится, а сердцем своим усоветует вринути тя в ров, и егда обрящет время, не насытится крове.

¹⁶ Аще срящут тя злая, ту обрящеши его первее себе,

¹⁷ и яко помагаяй подсечет пяту твою:

¹⁸ покивает главою своею и восплещет рукама своима, и много пошепчет и изменит лице свое.