Библия на церковно-славянском языке - транслитерация современным русским алфавитом
(1751)

Вторая книга Царств

◄◄ | ◄ | Глава ⚫ | ► | ►►

¹ И бысть по сих, и порази Давид иноплеменники и победи их, и взя Давид отлученное от руки иноплеменничи.

² И порази Давид Моава, и размери их ужами, положив их на земли: и быша два ужа на умерщвление, и два ужа на оживление: и бысть Моав Давиду в раба дающа дань.

³ И порази Давид Адраазара сына Раава царя Сувска, идущу ему поставити руку свою на реце Евфрате:

⁴ и предвзя Давид от него тысящу колесниц и седмь тысящ конник и двадесять тысящ мужей пешцев, и разруши Давид вся колесницы, и остави себе от них сто колесниц.

⁵ И прииде Сириа Дамаскова помощи Адраазару царю Сувску, и порази Давид от Сирии двадесять две тысящы мужей,

⁶ и постави Давид стражу в Сирии, яже под Дамаском, и бысть Сириа Давиду в рабы дающыя дань: и спасе Господь Давида во всех, аможе хождаше.

⁷ И взя Давид гривны златыя, яже быша на отроцех Адраазара царя Сувска, и принесе я во Иерусалим: и взя их Сусаким царь Египетск, егда взыде во Иерусалим во дни Ровоама сына Соломоня.

⁸ И от Метевака и от избранных градов Адраазаровых взя Давид медь многу зело, из неяже сотвори Соломон море медяно и столпы, и умывалницы и вся сосуды.

⁹ И услыша Фоа царь Имафский, яко порази Давид всю силу Адраазарову,

¹⁰ и посла Фоа Иеддурама сына своего к царю Давиду вопросити его яже о мире, и благословити его, понеже победи Адраазара и уби его, зане сопротивляяся бе Адраазару: и в руку его быша сосуды сребряны и сосуды златы и сосуды медяны:

¹¹ и сия освяти царь Давид Господу со сребром и златом, еже освяти от всех градов, имиже возоблада,

¹² от Идумеи и от Моава, и от сынов Аммоних и от иноплеменник, и от Амалика и от корыстей Адраазара сына Раава, царя Сувска.

¹³ И сотвори Давид (себе) имя: и егда возвращашеся, порази Идумею в Гевелеме, до осминадесять тысящ:

¹⁴ и постави во Идумеи Давид стражу, во всей Идумеи, и быша вси Идумеане раби царю Давиду: и спасе Господь Давида во всех, аможе хождаше.

¹⁵ И царствова Давид над всем Израилем, и бе Давид творяй суд и правду над всеми людьми своими.

¹⁶ И Иоав сын Саруин над воинствы (его), и Иосафат сын Ахилудов над памятописанми,

¹⁷ и Садок сын Ахитов и Ахимелех сын Авиафарь жерцы, и Саса книжник,

¹⁸ и Ванеа сын Иодаев советник, и Хелефий и Фелетий, и сынове Давидовы началницы двора быша.