Библия на церковно-славянском языке - транслитерация современным русским алфавитом
(1751)

Первая книга Царств

◄◄ | ◄ | Глава ⚫ | ► | ►►

¹ И бысть егда состареся Самуил, и постави сыны своя судити Израилеви.

² И сия имена сыном его: первенец Иоиль, и имя второму Авиа, судии в Вирсавеи.

³ И не поидоша сынове его путем его: и уклонишася вслед лихоимания, и приимаху дары, и развращаху суды.

⁴ И собрашася мужие Израилевы, и приидоша к Самуилу во Армафем

⁵ и реша ему: се, ты состарелся еси, сынове же твои не ходят по пути твоему: и ныне постави над нами царя, да судит ны, якоже и прочии языки.

⁶ И бысть лукав глагол пред очима Самуиловыма, яко реша: даждь нам царя, да судит ны. И помолися Самуил ко Господу.

⁷ И рече Господь Самуилу: послушай гласа людий, якоже глаголют к тебе, яко не тебе уничижиша, но Мене уничижиша, еже не царствовати Ми над ними:

⁸ по всем делом, яже сотвориша Ми, от негоже дне изведох их из земли Египетски до днешняго дне, и оставиша Мя, и послужиша богом иным, тако тии творят и тебе:

⁹ и ныне послушай гласа их: обаче засвидетелствуя засвидетелствуеши им и возвестиши им правду цареву, иже царствовати будет над ними.

¹⁰ И рече Самуил вся словеса Господня к людем просящым от него царя,

¹¹ и глагола (им): сие будет оправдание царево, иже царствовати имать над вами: сыны вашя возмет и поставит я колесничники своя, и на кони всадит их, и предтекущих пред колесницами его:

¹² и поставит я себе сотники и тысящники и жателми жатвы своея, и оымут оыманием гроздия его, и творити орудия воинская его и орудия колесниц его:

¹³ и дщери вашя возмет в мироварницы и в поварницы и в хлебницы:

¹⁴ и села ваша и винограды вашя и масличины вашя благия возмет и даст рабом своим:

¹⁵ и семена ваша и винограды вашя одесятствует и даст скопцем своим и рабом своим:

¹⁶ и рабы вашя и рабыни вашя и стада ваша благая и ослы вашя отимет и одесятствует на дела своя:

¹⁷ и пажити вашя одесятствует, и вы будете ему раби:

¹⁸ и возопиете в день он от лица царя вашего, егоже избрасте себе, и не услышит вас Господь в день он, яко вы сами избрасте себе царя.

¹⁹ И не восхотеша людие послушати Самуила и реша ему: ни, но царь да будет над нами,

²⁰ и будем и мы якоже вси языцы: и судити имать нас царь наш, и изыдет пред нами, и поборет поборением о нас.

²¹ И слыша Самуил вся глаголы людий и глагола я во ушы Господеви.

²² И рече Господь к Самуилу: послушай гласа их, и постави им царя. И рече Самуил к мужем Израилевым: да идет кийждо вас во свой град.