Библия на церковно-славянском языке - транслитерация современным русским алфавитом
(1751)

Первая книга Царств

◄◄ | ◄ | Глава ⚫ | ► | ►►

¹ И бысть егда преста глаголати к Саулу, и душа Ионафана с душею Давидовою спряжеся, и возлюби его Ионафан от души своея.

² И поят его Саул во дни оны и не даде ему возвратитися в дом отца его.

³ И завеща Ионафан и Давид завет, понеже возлюби его от души своея:

⁴ и совлече Ионафан ризу свою верхнюю и даде ю Давиду, и ины одежды своя даже до меча своего и до лука своего и до пояса своего.

⁵ И хождаше Давид разумно во всех, аможе аще посылаше его Саул: постави же его Саул над мужи воинскими, и угоден бе пред очима всех людий и пред слугами Сауловыми.

⁶ И бысть, внегда входити им, егда возвратися Давид от победы над иноплеменником: и изыдоша (девы) ликовствующыя во сретение Саула царя от всех градов Израилевых поющя и скачущя в тимпанех с радостию и с гусльми.

⁷ И исхождаху жены ликующя и глаголющя: победи Саул с тысящами своими, а Давид со тмами своими.

⁸ И разгневася Саул зело, и лукавы явишася глаголы пред очима сауловыма о словеси сем. И рече Саул: Давиду даша тмы, мне же даша тысящы: и чего ему (несть), точию царства?

⁹ И бе Саул подзирая Давида от дне онаго и потом.

¹⁰ И бысть от утрешняго дне, и нападаше дух лукавый от Бога на Саула, и прорицаше посреде дому своего: и Давид пояше рукою своею (в гусли), якоже и по вся дни: копие же в руце Саули:

¹¹ и взя Саул копие и рече: поражу Давида к стене. И уклонися Давид от лица его дважды.

¹² И убояся Саул от лица Давидова, яко Господь бе с ним, а от Саула отступи:

¹³ и отстави его Саул от себе, и постави его себе тысященачалника: и исхождаше и вхождаше пред людьми.

¹⁴ И бе Давид во всех путех своих смысля, и Господь бе с ним.

¹⁵ И виде Саул, яко той смыслит зело, и бояшеся от лица его.

¹⁶ Весь же Израиль и Иуда любляху Давида, яко той вхождаше и исхождаше пред лицем людий.

¹⁷ И рече Саул к Давиду: се, дщи моя болшая Меров, сию тебе дам в жену, токмо буди ми в сына силы и поборай брани Господни. И Саул рече: да не будет рука моя на нем, но да будет рука иноплеменнича.

¹⁸ И рече Давид к Саулу: кто аз есмь? И кое житие сродства отца моего во Израили, яко да буду зять царский?

¹⁹ И бысть во время, егда даней быти подобаше Мерове дщери Саулове Давиду, сия дадеся Адриилу Молафитскому в жену.

²⁰ И возлюби Мелхола дщерь Саулова Давида: и возвестися Саулу, и угодно бысть пред очима его слово.

²¹ И рече Саул: дам ему ю, и будет ему в соблазн. И бе на Саула рука иноплеменнича. И рече Саул к Давиду: в силах будеши ми зять днесь.

²² И заповеда Саул отроком своим, глаголя: рцыте вы тайно Давиду, глаголюще: се, благоволит о тебе царь, и вси отроцы его любят тя, и ты буди зять царю.

²³ И глаголаша отроцы Сауловы во ушы Давиду глаголы сия. И рече Давид: еда легко пред очима вашима, еже быти (ми) зятем царю? Аз бо есмь муж смирен и не славен.

²⁴ И возвестиша отроцы Саулу сия словеса, яже глагола Давид.

²⁵ И рече Саул: тако рцыте Давиду: не хощет царь с богатством (зятя), но токмо во сте краенеобрезаний иноплеменнических отмстити врагом царевым. Саул бо мысляше вдати Давида в руце иноплеменником.

²⁶ И возвестиша отроцы Сауловы глаголы сия Давиду, и угодна быша словеса сия пред очима Давидовыма, еже быти в зятя царю.

²⁷ И не по мнозех днех, воста Давид и иде сам и мужие его с ним, и уби от иноплеменник двести мужей: и принесе краенеобрезания их царю и вдаде я ему, и бысть зять царю, и вдаде ему царь Мелхолу дщерь свою в жену.

²⁸ И виде Саул, яко Господь есть с Давидом, и весь Израиль любит его:

²⁹ и приложи Саул оттоле паче боятися Давида. И бысть Саул враждуя на Давида во вся дни.

³⁰ И исхождаху князи иноплеменничи, и бысть от начала исхождения их, Давид разумен бе паче всех слуг Сауловых, и почтеся имя его зело.