Бiблiя беларуская - пераклад Василя Сёмухи
(1995, Минск)

Да Рымлянаў

◄◄ | ◄ | Глава ⚫ | ► | ►►

¹ Такім чынам - няма сёньня ніякай асуды тым, хто ў Ісусе Хрысьце жыве не паводле плоці, а паводле духу,

² бо закон Духа жыцьця ў Хрысьце Ісусе вызваліў мяне ад закона грэху і сьмерці.

³ Як закон, аслаблены плоцьцю, быў бясьсільны, дык Бог паслаў Сына Свайго ў падабенстве плоці грахоўнай у ахвяру за грэх, і асудзіў грэх у плоці,

⁴ каб апраўданьне закона спраўдзілася ў нас, хто не паводле плоці жыве, а паводле Духа.

⁵ Бо, хто жыве паводле плоці, пра плоцкае думае, а хто жыве паводле Духа - пра духоўнае.

⁶ Помыслы плоцкія - сьмерць, а помыслы Духа - жыцьцё і мір,

⁷ бо помыслы плоці - гэта варожасьць да Бога; бо закону Божаму не ўпакорваюцца, ды і ня могуць.

⁸ А таму тыя, што жывуць паводле плоці, Богу дагадзіць ня могуць.

⁹ Але вы не паводле плоці жывяце, а паводле Духа, калі толькі Дух Божы жыве ў вас. Калі ж хто Духа Хрыстовага ня мае, той не Ягоны.

¹⁰ А калі Хрыстос у вас, дык цела мёртвае для грэху, а дух жывы для праведнасьці.

¹¹ Калі ж Дух Таго, Хто ўваскрэсіў зь мёртвых Ісуса, жыве ў вас, дык Той, хто ўваскрэсіў Хрыста зь мёртвых, ажывіць і вашыя сьмяротныя целы Духам Сваім, Які жыве ў вас.

¹² Дык вось, браты, мы не даўжнікі плоці, каб жыць паводле плоці;

¹³ бо, калі жывяце паводле плоці, дык памраце, а калі Духам нішчыце ўчынкі плоцкія, жыць будзеце;

¹⁴ бо ўсе, каго водзіць Дух Божы, - сыны Божыя;

¹⁵ бо вы не прынялі Духа рабства, каб зноў жыць у страху, а прынялі Духа ўсынаўленьня, Якім заклікаем: Авва, Войча!

¹⁶ Гэты самы Дух сьведчыць духу нашаму, што мы - дзеці Божыя.

¹⁷ А калі дзеці, дык і спадкаемцы Божыя, супольныя спадкаемцы Хрыстовыя, калі толькі зь Ім пакутуем, каб зь Ім і праславіцца.

¹⁸ Бо думаю, што цяперашнія часовыя пакуты нічога ня вартыя ў параўнаньні з тою славаю, якая адкрыецца ў нас.

¹⁹ Бо стварэньне з надзеяй чакае сыноў Божых, -

²⁰ таму што стварэньне скарылася марнасьці не па добрай волі, а па волі таго, хто ўпакорыў (яго), спадзяючыся,

²¹ што і само стварэньне вызвалена будзе з рабства тленьня ў свабоду славы дзяцей Божых.

²² Бо ведаем, што ўсе стварэньні енчаць і пакутуюць дагэтуль;

²³ і ня толькі яны, але і мы самі, маючы пачатак Духа, і мы ў сабе енчым, чакаючы ўсынаўленьня, адкупленьня цела нашага.

²⁴ Бо мы ўратаваныя праз надзею. А надзея, калі бачыць, ня ёсьць надзея; бо, калі хто бачыць, дык навошта ж яму і спадзявацца?

²⁵ Але калі спадзяёмся на тое, чаго ня бачым, тады чакаем цярпліва.

²⁶ Гэтак сама і Дух мацуе (нас) у нямогласьцях нашых; бо мы ня ведаем, за што маліцца, як трэба, а Сам Дух заступаецца за нас уздыханьнямі нявымоўнымі.

²⁷ А Той, Хто выпрабоўвае сэрцы, ведае, якая думка ў Духа, бо Ён рупіцца за сьвятых, па волі Божай.

²⁸ Пры гэтым ведаем, што тым, хто любіць Бога, хто пакліканы па Ягонай пастанове, усё спрыяе на добрае;

²⁹ бо каго Ён наперад уведаў, тым і наканаваў (быць) падобнымі да вобраза Сына Свайго, каб Ён быў першародны сярод многіх братоў;

³⁰ а каго Ён наканаваў, тых і паклікаў; а каго паклікаў, тых і апраўдаў; а каго апраўдаў, тых і ўславіў.

³¹ Што ж сказаць на гэта? Калі Бог за нас, хто супроць нас?

³² Той, Хто Сына Свайго не пашкадаваў, а аддаў Яго за ўсіх нас, як зь Ім не даруе нам і ўсяго?

³³ Хто будзе вінаваціць выбранцаў Божых? Бог апраўдае іх.

³⁴ Хто асуджае? Хрыстос (Ісус) памёр, але і ўваскрэс: Ён і праваруч Бога, Ён і заступнік за нас.

³⁵ Хто адлучыць нас ад любові Божай: скруха, ці ўціск, ці ганеньне, ці голад, ці галеча, ці небясьпека, ці меч? як напісана:

³⁶ "за Цябе забіваюць нас кожнага дня; лічаць нас за авечак, на зарэз асуджаных".

³⁷ Але ўсё гэта пераадольваем сілаю Таго, Хто палюбіў нас.

³⁸ Бо я ўпэўнены, што ні сьмерць, ні жыцьцё, ні анёлы, ні Пачаткі, ні Сілы, ні сёньняшняе, ні будучае,

³⁹ ні вышыня, ні глыбіня, ні іншае якое стварэньне ня можа адлучыць нас ад любові Божай у Хрысьце Ісусе, Госпадзе нашым.