Библия на церковно-славянском языке - транслитерация современным русским алфавитом
(1751)

Послание апостола Павла Римлянам

◄◄ | ◄ | Глава ⚫ | ► | ►►

¹ Что убо речем, пребудем ли во гресе, да благодать преумножится? Да не будет.

² Иже бо умрохом греху, како паки оживем о нем?

³ Или не разумеете, яко елицы во Христа Иисуса крестихомся, в смерть Его крестихомся?

⁴ Спогребохомся убо Ему крещением в смерть, да якоже воста Христос от мертвых славою Отчею, тако и мы во обновлении жизни ходити начнем.

⁵ Аще бо сообразни быхом подобию смерти Его, то и воскресения будем,

⁶ сие ведяще, яко ветхии наш человек с Ним распятся, да упразднится тело греховное, яко ктому не работати нам греху.

⁷ Умерый бо свободися от греха.

⁸ Аще же умрохом со Христом, веруем, яко и живи будем с Ним,

⁹ ведяще, яко Христос воста от мертвых, ктому уже не умирает: смерть Им ктому не обладает.

¹⁰ Еже бо умре, греху умре единою: а еже живет, Богови живет.

¹¹ Такожде и вы помышляйте себе мертвых убо быти греху, живых же Богови, о Христе Иисусе Господе нашем.

¹² Да не царствует убо грех в мертвеннем вашем теле, во еже послушати его в похотех его:

¹³ ниже представляйте уды вашя оружия неправды греху: но представляйте себе Богови яко от мертвых живых, и уды вашя оружия правды Богови.

¹⁴ Грех бо вами да не обладает. Несте бо под законом, но под благодатию.

¹⁵ Что убо, согрешим ли, зане несмы под законом, но под благодатию, да не будет.

¹⁶ Не весте ли, яко емуже представляете себе рабы в послушание, раби есте, егоже послушаете, или греха в смерть, или послушания в правду?

¹⁷ Благодарим убо Бога, яко бесте раби греху, послушасте же от сердца, в оньже и предастеся образ учения.

¹⁸ Свобождшеся же от греха, поработистеся правде.

¹⁹ Человеческо глаголю, за немощь плоти вашея. Якоже бо представисте уды вашя рабы нечистоте и беззаконию в беззаконие, тако ныне представите уды вашя рабы правде во святыню.

²⁰ Егда бо раби бесте греха, свободни бесте от правды.

²¹ Кий убо тогда иместе плод? О нихже ныне стыдитеся, кончина бо онех, смерть.

²² Ныне же свобождшеся от греха, порабощшеся же Богови, имате плод ваш во святыню, кончину же жизнь вечную.

²³ Оброцы бо греха смерть: дарование же Божие живот вечный о Христе Иисусе Господе нашем.