Библия на церковно-славянском языке - транслитерация современным русским алфавитом
(1751)

Апокалипсис

◄◄ | ◄ | Глава ⚫ | ► | ►►

¹ И пятый Ангел воструби, и видех звезду с небесе спадшу на землю: и дан бысть ей ключь студенца бездны:

² и отверзе студенца бездны, и взыде дым от студенца яко дым пещи велики, и омерче солнце и воздух от дыма студеничнаго.

³ И от дыма изыдоша прузи на землю, и дана бысть им область, якоже имут область скорпии земныя.

⁴ И речено бысть им, да не вредят травы земныя, ни всякаго злака, ни всякаго древа, но человеки точию, иже не имут печати Божия на челех своих.

⁵ И дано бысть им, да не убиют их, но да муку приимут пять месяцей: и мучение их яко мучение скорпиево, егда усекнет человека.

⁶ И в тыя дни взыщут человецы смерти, и не обрящут ея: и вожделеют умрети, и убежит от них смерть.

⁷ И уподобления пругов подобна конем уготовленым на брань: и на главах их яко венцы уподоблени злату, и лица их яко лица человеческа:

⁸ и имеяху власы, яко власы женския, и зубы их, яко львов беша:

⁹ и имеяху броня, яко броня железны, и глас крил их, яко глас колесниц, егда кони мнози текут на брань:

¹⁰ и имеяху ошибы подобны скорпииным, и жала бяху во ошибех их: и дана бе область им вредити человеки пять месяц.

¹¹ И имели над собою царя аггела бездны, емуже имя еврейски Аваддон, а еллински Аполлион.

¹² Горе едино отиде: се, грядут еще два горя по сих.

¹³ И шестый Ангел воструби, и слышах глас един от четырех рогов олтаря златаго сущаго пред Богом,

¹⁴ глаголющий шестому Ангелу имеющу трубу: разреши четыри Ангелы связаны при реце велицей Евфрат.

¹⁵ И разрешени быша четыри Ангели уготовани на час и день, и месяц и лето, да избиют третию часть человек.

¹⁶ И число воинов конных две тме тем: и слышах число их.

¹⁷ И тако видех в видении кони, и седящыя на них имущыя броня огненны и иакинфовы и жупелны: и главы конем (их) яко главы львом, и из уст их исхождаше огнь и дым и жупел.

¹⁸ И от триех язв сих погибе третия часть человеков, от огня и от дыма и от жупела, исходящих из уст их:

¹⁹ область бо коней во устех их бе, и ошиби их подобни змием, имуще главы и теми пакости деюще.

²⁰ И прочии от человек, иже не вреждени быша язвами сими, ниже покаяшася от дел рук своих, да не поклонятся демоном, ни идолом златым и сребряным, и медяным и каменным и древяным, иже ни видети могут, ни слышати, ни ходити:

²¹ и не покаяшася от убийств своих, ни от волхвований своих, ниже от блуда своего, ниже от татьб своих.