Бiблiя беларуская - пераклад Василя Сёмухи
(1995, Минск)

Псалтыр

◄◄ | ◄ | Глава ⚫ | ► | ►►

¹ Агея і Захарыі. Алілуя. Хвалі душа мая Госпада.

² Буду славіць Госпада, пакуль жыву; пецьму Богу майму, пакуль існую.

³ Не кладзеце надзеяў на князёў, на сына людзкога, у якім ратунку няма.

⁴ Выходзіць дух ягоны, і ён вяртаецца ў зямлю сваю; у той дзень зьнікаюць усе намеры ягоныя.

⁵ Шчасны, каму памочнік Бог Якаваў, у каго надзея на Госпада Бога ягонага,

⁶ Які стварыў неба і зямлю, мора і ўсё, што ў іх, Які вечна захоўвае вернасьць,

⁷ творыць суд пакрыўджаным, дае хлеб галодным. Гасподзь вызваляе вязьняў;

⁸ Гасподзь размыкае вочы сьляпым, Гасподзь сагнутых выпроствае; Гасподзь любіць праведных.

⁹ Гасподзь ахоўвае прыхадняў, падтрымлівае сірату і ўдаву; а шлях бязбожных - скрыўляе.

¹⁰ Гасподзь будзе валадарыць вечна, Бог твой, Сіёне, з роду ў род. Алілуя.