Бiблiя беларуская - пераклад Василя Сёмухи
(1995, Минск)

Псалтыр

◄◄ | ◄ | Глава ⚫ | ► | ►►

¹ Песьня ўзыходжаньня. Спамяні, Госпадзе, Давіда, і ўсе ягоныя пакуты:

² як ён прысягаў Госпаду, даваў зарок Моцнаму Якава;

³ "не ўвайду ў палатку дома майго, ня ўзыду на ложак мой;

⁴ ня дам сну вачам маім і павекам маім дрымоты,

⁵ пакуль не знайду месца Госпаду, жытлішча Моцнаму Якава".

⁶ Вось, мы чулі пра яго ў Эфраце, знайшлі яго на палях Ярыма.

⁷ Пойдзем да жытлішча Ягонага, паклонімся падножжу ног Ягоных.

⁸ Стань, Госпадзе, на месца пакою Твайго, Ты і каўчэг магутнасьці Тваёй.

⁹ Сьвятары Твае апранаюцца ў праўду, і сьвятыя Твае ўзрадуюцца.

¹⁰ Дзеля Давіда, раба Твайго, не адвярні аблічча памазанца Твайго.

¹¹ Прысягаў Гасподзь Давіду ў ісьціне, і не зрачэцца яе; "ад плоду ўлоньня твайго пасаджу на троне тваім.

¹² Калі сыны твае будуць шанаваць запавет Мой і Мае сьведчаньні, якім Я іх навучу: дык і іхнія сыны вечна сядзецьмуць на троне тваім".

¹³ Бо выбраў Гасподзь Сіён; пажадаў яго жытлом Сабе.

¹⁴ "Гэта - спакой Мой навечна; тут пасялюся, бо Я пажадаў яго.

¹⁵ Ежу ягоную дабраслаўляючы дабраслаўлю, убогіх ягоных накармлю хлебам;

¹⁶ сьвятароў ягоных апрану ў выратаваньне, і сьвятыя ягоныя радасьцю ўзрадуюцца.

¹⁷ Там згадую рог Давіду, пастаўлю сьветач памазанцу Майму.

¹⁸ Ворагаў ягоных апрану ў сорам; а на ім будзе зьзяць вянок ягоны".