Библия на церковно-славянском языке - транслитерация современным русским алфавитом
(1751)

Притчи

◄◄ | ◄ | Глава ⚫ | ► | ►►

¹ Темже ты премудрость проповеждь, да разум послушает тебе.

² На высоких бо краех есть, посреде же стезь стоит:

³ при вратех бо сильных приседит, во входех же поется.

⁴ Вас, о, человецы, молю, и вдаю мой глас сыном человеческим.

⁵ Уразумейте, незлобивии, коварство, ненаказаннии же, приложите сердце.

⁶ Послушайте мене: честная бо реку и изнесу от устен правая.

⁷ Яко истине поучится гортань мой, мерзки же предо мною устны лживыя.

⁸ С правдою вси глаголы уст моих, ничтоже в них стропотно, ниже развращенно.

⁹ Вся права разумевающым, и права обретающым разум.

¹⁰ Приимите наказание, а не сребро, и разум паче злата искушена: избирайте же ведение паче злата чиста.

¹¹ Лучши бо премудрость камений многоценных, всякое же честное недостойно ея есть.

¹² Аз премудрость вселих совет, и разум и смысл аз призвах.

¹³ Страх Господень ненавидит неправды, досаждения же и гордыни, и пути лукавых: возненавидех же аз развращенныя пути злых.

¹⁴ Мой совет и утверждение, мой разум, моя же крепость.

¹⁵ Мною царие царствуют, и сильнии пишут правду:

¹⁶ мною вельможи величаются, и властитилие мною держат землю.

¹⁷ Аз любящыя мя люблю, ищущии же мене обрящут благодать.

¹⁸ Богатство и слава моя есть, и стяжание многих и правда.

¹⁹ Лучше есть плодити мене, паче злата и камения драга: мои же плоды лучше сребра избранна.

²⁰ В путех правды хожду и посреде стезь оправдания живу,

²¹ да разделю любящым мя имение, и сокровища их исполню благих. Аще возвещу вам бывающая на всяк день, помяну, яже от века, изчести.

²² Господь созда мя (евр.: стяжа мя) начало путий Своих в дела Своя,

²³ прежде век основа мя, в начале, прежде неже землю сотворити,

²⁴ и прежде неже бездны соделати, прежде неже произыти источником вод,

²⁵ прежде неже горам водрузитися, прежде же всех холмов раждает мя.

²⁶ Господь сотвори страны и ненаселенныя, и концы населенныя поднебесныя.

²⁷ Егда готовяше небо, с Ним бех, и егда отлучаше престол Свой на ветрех,

²⁸ и егда крепки творяше вышния облаки, и егда тверды полагаше источники поднебесныя,

²⁹ и егда полагаше морю предел его, да воды не мимо идут уст его, и крепка творяше основания земли, бех при нем устрояющи.

³⁰ Аз бех, о нейже радовашеся, на всяк же день веселяхся пред лицем Его на всяко время,

³¹ егда веселяшеся вселенную совершив, и веселяшеся о сынех человеческих.

³² Ныне убо, сыне, послушай мене: и блажени, иже пути моя сохранят.

³³ Услышите премудрость, и умудритеся, и не отмещите.

³⁴ Блажен муж, иже послушает мене, и человек, иже пути моя сохранит, бдяй при моих дверех присно, соблюдаяй праги моих входов:

³⁵ исходи бо мои исходи живота, и уготовляется хотение от Господа:

³⁶ согрешающии же в мя нечествуют на своя души, и ненавидящии мя любят смерть.