Библия на церковно-славянском языке - транслитерация современным русским алфавитом
(1751)

Притчи

◄◄ | ◄ | Глава ⚫ | ► | ►►

¹ Сыне, моей премудрости внимай, к моим же словесем прилагай ухо твое,

² да сохраниши мысль благую: чувство же моих устен заповедает тебе.

³ Не внимай злей жене: мед бо каплет от устен жены блудницы, яже на время наслаждает твой гортань:

⁴ последи же горчае желчи обрящеши, и изощренну паче меча обоюду остра:

⁵ безумия бо нозе низводят употребляющих ю со смертию во ад, стопы же ея не утверждаются:

⁶ на пути бо животныя не находит, заблужденна же течения ея и неблагоразумна.

⁷ Ныне убо, сыне, послушай мене и не отриновенна сотвори моя словеса:

⁸ далече от нея сотвори путь твой и не приближися ко дверем домов ея,

⁹ да не предаст иным живота твоего, и твоего жития немилостивым,

¹⁰ да не насытятся инии твоея крепости, твои же труды в домы чуждыя внидут,

¹¹ и раскаешися на последок твой, егда иструтся плоти тела твоего, и речеши:

¹² како возненавидех наказание, и от обличений уклонися сердце мое?

¹³ Не послушах гласа наказующаго мя, и ко учащему мя не прилагах уха моего:

¹⁴ вмале бех во всяцем зле посреде церкве и сонмища.

¹⁵ Сыне, пий воды от своих сосудов и от твоих кладенцев Источника:

¹⁶ да преизливаются тебе воды от твоего источника, во твоя же пути да происходят твоя воды.

¹⁷ Да будут тебе единому имения, и да никтоже чуждь причастится тебе.

¹⁸ Источник твоея воды да будет тебе твой, и веселися с женою, яже от юности твоея:

¹⁹ елень любве и жребя твоих благодатей да беседует тебе, твоя же да предидет тебе и да будет с тобою во всяко время: в дружбе бо сея спребываяй умножен будеши.

²⁰ Не мног буди к чуждей, ниже объят буди объятии не твоея:

²¹ пред очима бо суть Божиима путие мужа, вся же течения его назирает.

²² Законопреступления мужа уловляют: пленицами же своих грехов кийждо затязается.

²³ Сей скончавается с ненаказанными: от множества же своего жития извержется и погибает за безумие.