Бiблiя беларуская - пераклад Василя Сёмухи
(1995, Минск)

Выслоўi

◄◄ | ◄ | Глава ⚫ | ► | ►►

¹ Слухайце, дзеці, настаўленьня бацькавага, і зважайце, каб навучыцца розуму;

² бо я дам вам добрую навуку. Не адкідайце наказу майго.

³ Бо і я быў сын у бацькі майго, пяшчотна любімы і адзіны ў маці маёй.

⁴ І ён вучыў мяне і казаў мне: хай будуць у сэрцы тваім словы мае; захоўвай наказы мае і жыві.

⁵ Здабывай мудрасьць, набывай розум; не забывай гэтага і ня цурайся слоў маіх, а кіруйся імі!

⁶ Не адкідай яе, і яна будзе ахоўваць цябе; любі яе, і яна будзе цябе берагчы.

⁷ Аснова мудрасьці: набывай мудрасьць і за ўсё, што маеш, набывай розум.

⁸ Высока цані яе, і яна ацэніць цябе; яна акрые славай цябе, калі ты прыгорнеш яе;

⁹ ускладзе на галаву тваю прыгожы вянок, падаруе табе цудоўны вянок.

¹⁰ Слухай, сыне мой, і прымі словы мае, - і памножацца гады твайго жыцьця.

¹¹ Я паказваю табе шлях мудрасьці, вяду цябе па сьцежках простых.

¹² Калі пойдзеш, крокам тваім ня будзе завады, і калі пабяжыш, не спатыкнешся.

¹³ Моцна трымайся наказу, не адкідай, захоўвай яго; бо ён - жыцьцё тваё.

¹⁴ Ня выходзь на сьцежку бязбожнікаў, і не хадзі па дарозе ліхіх;

¹⁵ пакінь яе, не хадзі ёю, ухіляйся ад яе і праходзь міма.

¹⁶ бо яны не заснуць, пакуль ня ўчыняць ліхога; прападзе сон у іх, пакуль яны не давядуць каго да падзеньня;

¹⁷ бо яны ядуць хлеб беззаконьня і п'юць віно рабунку.

¹⁸ Сьцежка праведных - як сьвяціла прамяністае, якое болей і болей сьвятлее да поўнага дня.

¹⁹ А шлях бязбожных - як цемра; яны ня ведаюць, на што спатыкнуцца.

²⁰ Сыне мой! слоў маіх слухайся, і да прамоваў маіх нахілі тваё вуха;

²¹ хай не адыдуць яны ад вачэй тваіх; захоўвай іх усярэдзіне сэрца твайго:

²² бо яны жыцьцё таму, хто знайшоў іх, і ацаленьне ўсяму яго целу.

²³ Больш за ўсё запаветнае захоўвай сэрца тваё; бо ў ім - крыніца жыцьця.

²⁴ Адкінь ад сябе ілжывасьць вуснаў, і круцельства языка адхісьні ад сябе.

²⁵ Вочы твае хай наперад глядзяць, і позірк твой хай скіраваны будзе перад табою.

²⁶ Абдумай сьцежку назе тваёй, і ўсе дарогі твае хай будуць пэўныя.

²⁷ Ня ўхіляйся ні направа, ні налева; адвядзі нагу тваю ад ліхога.