Библия на церковно-славянском языке - транслитерация современным русским алфавитом
(1751)

Притчи

◄◄ | ◄ | Глава ⚫ | ► | ►►

¹ Бегает нечестивый ни единому же гонящу, праведный же яко лев уповая.

² За грехи нечестивых судове востают: муж же хитрый угасит я.

³ Продерзый в нечестиих оклеветает нищыя, якоже дождь сильный не полезен:

⁴ тако оставившии закон хвалят нечестие, любящии же закон ограждают себе стену.

⁵ Мужие злии не уразумеют суда, ищущии же Господа уразумеют о всем.

⁶ Лучше нищь ходяй во истине, нежели богат ложь.

⁷ Хранит закон сын разумный: а иже пасет несытость, безчестит отца своего.

⁸ Умножаяй богатство свое с лихвами и прибытки милующему нищыя собирает е.

⁹ Укланяяй ухо свое не послушати закона и сам молитву свою омерзил.

¹⁰ Иже льстит правыя на пути злем, во истление сам впадет: беззаконнии же минуют благая и не внидут в ня.

¹¹ Премудр у себе муж богатый, убогий же разумив презрит его.

¹² Помощию праведных многа бывает слава, на местех же нечестивых погибают человецы.

¹³ Покрываяй нечестие свое не успеет во благая, поведая же обличения возлюблен будет.

¹⁴ Блажен муж, иже боится всех за благоговение, а жестосердый впадает во злая.

¹⁵ Лев алчен и волк жажден, иже тиранствует, нищь сый, над языком убогим.

¹⁶ Царь скуден уроком велик клеветник (бывает), а ненавидяй неправды долго лет поживет.

¹⁷ Мужа, иже в вине смертне, выручаяй беглец будет, а не утвержден. Наказуй сына, и возлюбит тя и даст лепоту твоей души, не послушает языка законопреступна.

¹⁸ Ходяй праведно помощь приимет, ходяй же в стропотны пути увязнет.

¹⁹ Делаяй свою землю насытится хлебов, гоняй же праздность насытится нищеты.

²⁰ Муж веры достойный много благословится, злый же не без мучения будет.

²¹ Иже не срамляется лица праведных, не благ: таковый за укрух хлеба продаст мужа.

²² Тщится обогатитися муж завидлив, и не весть, яко милостивый возобладает им.

²³ Обличаяй человечы пути благодать имать паче языком ласкающаго.

²⁴ Иже отвергает отца или матерь и мнится не согрешати, сей сопричастник есть мужу нечестиву.

²⁵ Неверный муж судит туне, а иже надеется на Господа, в прилежании будет.

²⁶ Иже надеется на дерзо сердце, таковый безумен: а иже ходит в премудрости, спасется.

²⁷ Иже дает убогим, не оскудеет: а иже отвращает око свое, в скудости будет мнозе.

²⁸ На местех нечестивых стенят праведнии, в погибели же их умножатся праведнии.