Библия на церковно-славянском языке - транслитерация современным русским алфавитом
(1751)

Притчи

◄◄ | ◄ | Глава ⚫ | ► | ►►

¹ Аще сядеши вечеряти на трапезе сильнаго, разумно разумевай предлагаемая тебе,

² и налагай руку твою, ведый, яко сицевая тебе подобает уготовити:

³ аще же несытнейший еси, не желай брашен его: сия бо имут живот ложен.

⁴ Не распростирайся убог сый с богатым, твоею же мыслию удаляйся.

⁵ Аще устремиши на него око твое, никогдаже явится: соделаны бо суть ему крила яко орлу, и обращается в дом настоятеля своего.

⁶ Не вечеряй с мужем завистливым, ниже похощеши пищей его:

⁷ имже бо образом аще кто поглотит власы, сице яст и пиет: ниже к себе да введеши его и снеси хлеб твой с ним:

⁸ изблюет бо его и осквернит словеса твоя добрая.

⁹ Во ушию безумнаго ничтоже глаголи, да не когда поругает разумная словеса твоя.

¹⁰ Не прелагай предел вечных и в стяжание сирот не вниди:

¹¹ избавляяй бо их Господь крепок есть и разсудит суд их с тобою.

¹² Даждь в наказание сердце твое, ушеса же твоя уготовай словесем чувственным.

¹³ Не преставай младенца наказовати: аще бо жезлом биеши его, не умрет (от него):

¹⁴ ты бо побиеши его жезлом, душу же его избавиши от смерти.

¹⁵ Сыне, аще премудро будет сердце твое, возвеселиши и мое сердце,

¹⁶ и пребудут в словесех твои устне к моим устнам, аще права будут.

¹⁷ Да не ревнует сердце твое грешником, но в страсе Господни буди весь день:

¹⁸ аще бо соблюдеши я, будут ти внуцы, и упование твое не отступит.

¹⁹ Слушай, сыне, и премудр бывай и исправляй мысли твоего сердца:

²⁰ не буди винопийца, ниже прилагайся к сложением и купованием мяс:

²¹ всяк бо пияница и блудник обнищает, и облечется в раздранная и в рубища всяк сонливый.

²² Слушай, сыне, отца родившаго тя, и не презирай, егда состареется мати твоя.

²³ Истину стяжи и не отрини мудрости и учения и разума.

²⁴ Добре воспитовает отец праведен, о сыне же премудрем веселится душа его.

²⁵ Да веселится отец и мати о тебе, и да радуется рождшая тя.

²⁶ Даждь ми, сыне, твое сердце, очи же твои моя пути да соблюдают.

²⁷ Сосуд бо сокрушен чуждий дом, и студенец тесен чуждий:

²⁸ сей бо вскоре погибнет, и всякий законопреступник потребится.

²⁹ Кому горе? Кому молва? Кому судове? Кому горести и свары? Кому сокрушения вотще? Кому сини очи?

³⁰ Не пребывающым ли в вине? И не назирающым ли, где пирове бывают?

³¹ Не упивайтеся вином, но беседуйте ко человеком праведным, и беседуйте во проходех: аще бо на чашы и сткляницы вдаси очи твои, последи имаши ходити нажайший белилнаго древа:

³² последи же яко от змиа уязвен прострется, и якоже от кераста разливается ему яд.

³³ Очи твои егда узрят (жену) чуждую, уста твоя тогда возглаголют стропотная:

³⁴ и возляжеши яко в сердцы моря и якоже кормчий во мнозе волнении.

³⁵ Речеши же: биша мя, и не поболех, и поругашася ми, аз же не разумех: когда утро будет, да шед взыщу, с нимиже снидуся?