Бiблiя беларуская - пераклад Василя Сёмухи
(1995, Минск)

Выслоўi

◄◄ | ◄ | Глава ⚫ | ► | ►►

¹ Добрае імя лепшае за вялікае багацьце, і добрая слава лепшая за срэбра і золата.

² Багаты і бедны сустракаюцца адзін з адным; таго і другога стварыў Гасподзь.

³ Разумны бачыць бяду і хаваецца; а нявопытныя ідуць наперад, прымаюць кару.

⁴ За пакораю ідзе сьледам страх Гасподні, багацьце і слава і жыцьцё.

⁵ Церні і сеткі на дарозе падступнага; хто беражэ душу сваю, адыдзіся ад іх.

⁶ Наставі юнака на пачатку шляху яго: ён ня збочыць зь яго, калі і састарыцца.

⁷ Багаты пануе над бедным, і даўжнік робіцца рабом пазычальніка.

⁸ Хто сее няпраўду, пажне буру, і біч гневу яго прападзе.

⁹ Міласэрны будзе дабраславёны, бо дае беднаму ад хлеба свайго.

¹⁰ Прагані блюзьнера, і зьнікне разлад, і выйдзе зь ім свара і кляцьба.

¹¹ Хто любіць чысьціню сэрца, той мае прыемнасьць на вуснах, таму цар - сябар.

¹² Вочы Госпада ахоўваюць веды, а словы вераломнікаў Ён абвяргае.

¹³ Гультай кажа: "леў на вуліцы! сярод плошчы заб'юць мяне!"

¹⁴ Глыбокая прорва - вусны распусьніц; на каго ўгневаецца Гасподзь, той упадзе туды.

¹⁵ Глупства прывязалася да сэрца юнака; але дубец выхаваньня адвядзе яе ад яго.

¹⁶ Хто крыўдзіць беднага, каб памножыць сваё багацьце, і хто дае багатаму, той зьбяднее.

¹⁷ Прыхілі вуха тваё, і слухай словы мудрых, і сэрца тваё павярні да маіх ведаў;

¹⁸ бо добра будзе, калі ты будзеш хаваць іх у сэрцы тваім, і яны будуць таксама на вуснах тваіх.

¹⁹ Каб надзея твая была на Госпада, я вучу цябе і сёньня, і ты памятай.

²⁰ Ці ж ня пісаў я табе тройчы ў парадах і ў настаўленьні,

²¹ каб навучыць цябе дакладным словам ісьціны, каб ты мог сказаць словы ісьціны тым, хто папытае ў цябе?

²² Не абірай беднага, бо ён бедны; і не заціскай няшчаснага ў браме;

²³ бо Гасподзь заступіцца за справу іхнюю і забярэ душу ў рабаўнікоў іхніх.

²⁴ Не сябруй зь гняўлівым і ня супольнічай з чалавекам запальчывым,

²⁵ каб ня стаць на шляхі ягоныя і не наклікаць пятлі на душу тваю.

²⁶ Ня будзь з тых, якія даюць рукі і ручаюцца за пазыкі.

²⁷ Калі табе няма чым заплаціць, дык навошта даводзіць сябе, каб узялі пасьцель тваю з-пад цябе.

²⁸ Не перасоўвай мяжы даўняй, якую правялі бацькі твае.

²⁹ Ці бачыў ты чалавека спраўнага ва ўчынках сваіх? Ён будзе стаяць перад царамі; ён ня будзе стаяць перад простымі.