Бiблiя беларуская - пераклад Василя Сёмухи
(1995, Минск)

Выслоўi

◄◄ | ◄ | Глава ⚫ | ► | ►►

¹ Сэрца цара ў руках у Госпада, як патокі водаў: куды захоча, Ён кіруе яго.

² Усякі шлях чалавека просты ў вачах ягоных; а Гасподзь узважвае сэрцы.

³ Справядлівасьць і праўду чыніць - больш даспадобы Госпаду, чым ахвяра.

⁴ Гонар вачэй і пыха сэрца, сьветачы бязбожнікаў - грэх.

⁵ Задумы руплівага вядуць да дастатку, а кожны сквапны церпіць нястачу.

⁶ Набываньне скарбу ілжывым языком - мімалётная марнасьць тых, што шукаюць сьмерці.

⁷ Гвалт бязбожных абернецца супроць іх, бо яны выракліся праўды.

⁸ Крывая дарога ў чалавека разбэшчанага; а хто чысты, у таго ўчынкі пабожныя.

⁹ Лепей жыць у закутку на даху, чым са сварліваю жонкай у прасторным доме.

¹⁰ Душа бязбожніка прагне ліхаты: ня знойдзе літасьці ў вачах яго і сябар ягоны.

¹¹ Калі караюць блюзьнера, просты робіцца мудрым; і калі настаўляецца на розум мудры, дык ён набывае веды.

¹² Праведнік назірае за домам бязбожніка: як упадаюць бязбожныя ў няшчасьце.

¹³ Хто затуляе вуха сваё ад ляманту беднага, той і сам будзе лямантаваць - і ня будзе пачуты.

¹⁴ Дарунак таемны тушыць гнеў, а дарунак запазуху - моцную лютасьць.

¹⁵ Чыніць правасудзьдзе - радасьць праведніку і страх тым, хто нясе зло.

¹⁶ Чалавек, які зьбіўся з дарогі розуму, спачне ў зборні мёртвых.

¹⁷ Хто любіць весялосьць - зьбедніцца; і хто любіць віно і масьці - не разбагацее.

¹⁸ Выкупам будзе за праведнага бязбожны, і за пабожнага - хітры.

¹⁹ Лепей жыць у зямлі пустэльнай, чым з жонкаю сварліваю і сярдзітаю.

²⁰ Жаданы скарб і масьць - у доме ў мудрага; а неразумны чалавек распускае іх.

²¹ Хто трымаецца праўды і ласкі, знойдзе жыцьцё, праўду і славу.

²² Мудры ўваходзіць у горад моцных і руйнуе цьвярдыню іхняй надзеі.

²³ Хто беражэ вусны свае і язык свой, той асланяе ад бяды душу сваю.

²⁴ Пыхлівы злодзей - блюзьнер імя яму - дзее ў запале пыхі.

²⁵ Прагнасьць гультая заб'е яго, бо рукі ў яго адмаўляюцца працаваць;

²⁶ кожны дзень ён моцна прагне, а праведнік дае і не шкадуе.

²⁷ Ахвяра бязбожных - агіднасьць, асабліва калі з хітрасьцю прыносяць яе.

²⁸ Ілжывы сьведка загіне, а чалавек, які кажа, што ведае, будзе гаварыць заўсёды.

²⁹ Чалавек бязбожны дзёрзкі тварам сваім, а праведны трымае проста шлях свой.

³⁰ Няма мудрасьці і няма розуму і няма вады - насуперак Госпаду.

³¹ Каня рыхтуюць на дзень бітвы, але перамога - ад Госпада.