Библия на церковно-славянском языке - транслитерация современным русским алфавитом
(1751)

Притчи

◄◄ | ◄ | Глава ⚫ | ► | ►►

¹ Сыне, аще приим глагол моея заповеди, скрыеши в себе,

² послушает премудрости твое ухо, и приложиши сердце твое к разуму: приложиши же е в наказание сыну твоему.

³ Аще бо премудрость призовеши и разуму даси глас твой, чувство же взыщеши великим гласом,

⁴ и аще взыщеши ея яко сребра, и якоже сокровища испытаеши ю:

⁵ тогда уразумееши страх Господень и познание Божие обрящеши:

⁶ яко Господь дает премудрость, и от лица Его познание и разум:

⁷ и сокровищствует исправляющым спасение, защищает же шествие их,

⁸ еже сохранити пути оправданий, и путь благоговеинствующих Его сохранит.

⁹ Тогда уразумееши правду и суд и исправиши вся стези благия.

¹⁰ Аще бо приидет премудрость в твою мысль, чувство же твоей души добро быти возмнится.

¹¹ Совет добр сохранит тя, помышление же преподобное соблюдет тя,

¹² да избавит тя от пути злаго и от мужа, глаголюща ничтоже верно.

¹³ О, оставившии пути правыя, еже ходити в путех тмы!

¹⁴ О, веселящиися о злых и радующиися о развращении злем!

¹⁵ Ихже стези стропотны, и крива течения их, еже далече тя сотворити от пути права,

¹⁶ и чужда от праведнаго разума. Сыне, да тя не постигнет совет злый,

¹⁷ оставляяй учение юности, и завета Божественнаго забывый:

¹⁸ постави бо при смерти дом свой и при аде с земными деяния своя.

¹⁹ Вси ходящии по нему не возвратятся, ниже постигнут стезь правых: ни бо достигнут лет жизни.

²⁰ Аще бо быша ходили в стези благия, обрели убо быша стези правы гладки: блази будут жителие на земли, незлобивии же останут на ней:

²¹ яко правии вселятся на земли, и преподобнии останут на ней.

²² Путие нечестивых от земли погибнут, пребеззаконнии же изринутся от нея.