Бiблiя беларуская - пераклад Василя Сёмухи
(1995, Минск)

Выслоўi

◄◄ | ◄ | Глава ⚫ | ► | ►►

¹ Сыне мой, калі ты прымеш словы мае і захаваеш пры сабе запаведзі мае,

² і вуха сваё прыхіліш да мудрасьці і прытуліш сэрца тваё да разважлівасьці,

³ калі будзеш клікаць да ведаў і зьвяртацца да розуму;

⁴ калі будзеш шукаць яго, нібы срэбра, і знаходзіць яго, нібы скарб:

⁵ тады ўразумееш страх Гасподні і знойдзеш спазнаньне Бога.

⁶ Бо Гасподзь дае мудрасьць; і з вуснаў Яго - веды і розум;

⁷ Ён дае праведным выратаваньне; Ён - шчыт тым, што ў беззаганнасьці ходзяць.

⁸ Ён ахоўвае дарогу праўды і асланяе сьцежку сьвятых Сваіх.

⁹ Тады ты зразумееш справядлівасьць і права і шчырасьць, усялякую сьцежку дабра.

¹⁰ Калі мудрасьць увойдзе ў сэрца тваё, і веды будуць прыемныя душы тваёй:

¹¹ тады разважлівасьць будзе берагчы цябе, розум будзе ахоўваць цябе,

¹² каб адвесьці цябе ад дарогі ліхое, ад чалавека, які гаворыць няпраўду,

¹³ ад тых, што пакідаюць дарогі простыя, каб хадзілі дарогамі цемры;

¹⁴ ад тых, што радуюцца, робячы ліхое, захапляюцца ліхою распустай,

¹⁵ у якіх дарогі крывыя і якія блукаюць па сьцежках сваіх;

¹⁶ каб уратаваць цябе ад жонкі другога, чужой, якая злагоджвае словы свае,

¹⁷ якая пакінула сябра маладосьці сваёй і занядбала запаведзь Бога свайго.

¹⁸ Дом яе вядзе да сьмерці, і сьцежкі яе - да мёртвых;

¹⁹ ніхто, увайшоўшы да яе, не вяртаецца і ня ступае на дарогу жыцьця.

²⁰ Таму хадзі дарогаю добрых і трымайся сьцежкі праведнікаў,

²¹ бо праведныя будуць жыць на зямлі, і беспахібныя застануцца на ёй;

²² а бязбожныя будуць вынішчаны зь зямлі, і няверныя выкарчаваны зь яе.