Библия на церковно-славянском языке - транслитерация современным русским алфавитом
(1751)

Притчи

◄◄ | ◄ | Глава ⚫ | ► | ►►

¹ Лучше есть убог ходяй в простоте своей, неже богатый строптив устны своими и несмыслен.

² Идеже несть учения души, несть добро, и иже скор есть ногама, поткнется.

³ Неразумие мужа погубляет пути его, и Бога виновна творит в сердцы своем.

⁴ Богатство прилагает други многи: нищий же и от сущаго друга оставляемь бывает.

⁵ Свидетель лжив без муки не будет: оклеветаяй же неправедно не убежит ея.

⁶ Мнози угождают лицам царским: всяк же зол бывает в поношение мужеви.

⁷ Всяк, иже убогаго брата ненавидит, и от содружества далече будет. Мысль благая ведящым ю приближается, муж же мудр обрящет ю. Много творяй зла совершает злобу, а иже раздражает словесы, не спасется.

⁸ Стяжавый мудрость любит себе, а иже сохраняет разум, обрящет благая.

⁹ Свидетель лживый не без муки будет, а иже разжизает злобу, погибнет от нея.

¹⁰ Не пользует безумному сладость, и аще раб начнет с досаждением обладати.

¹¹ Милостив муж долготерпит, похвала же его превосходит законопреступных.

¹² Царево прещение подобно рыканию львову, и якоже роса злаку, тако тихость его.

¹³ Студ есть отцу сын безумен, и нечисты обеты от мзды блудницы.

¹⁴ Дом и имение разделяют отцы чадом: от Господа же сочетавается жена мужеви.

¹⁵ Страх содержит мужа женонравна: душа же празднаго взалчет.

¹⁶ Иже хранит заповеди, соблюдает свою душу, а нерадяй о своих путех погибнет.

¹⁷ Милуяй нища взаим дает Богови, по даянию же его воздастся ему.

¹⁸ Наказуй сына твоего, тако бо будет благонадежен: в досаждение же не вземлися душею твоею.

¹⁹ Злоумен муж много отщетится: аще же губитель есть, и душу свою приложит.

²⁰ Слушай, сыне, отца твоего наказания, да мудр будеши в последняя твоя.

²¹ Многи мысли в сердцы мужа: совет же Господень во век пребывает.

²² Плод мужеви милостыня: лучше же нищь праведный, нежели богат лжив.

²³ Страх Господень в живот мужеви: а безстрашный водворится на местех, идеже не наблюдается разум.

²⁴ Скрываяй в недрех руце свои неправедно ниже ко устом своим принесет я.

²⁵ Губителю раны приемлющу, безумный коварнее будет: аще же обличаеши мужа разумна, уразумеет чувство.

²⁶ Безчествуяй отца и отреваяй матерь свою срамоту приимет и поношение.

²⁷ Сын оставляяй хранити наказание отчее поучится словесем злым.

²⁸ Выручаяй отрока несмыслена досаждает оправданию: уста же нечестивых пожрут суд.

²⁹ Уготовляются невоздержным раны, и мучения подобне неразумным.