Библия на церковно-славянском языке - транслитерация современным русским алфавитом
(1751)

Четвёртая книга Моисеева Числа

◄◄ | ◄ | Глава ⚫ | ► | ►►

¹ И рече Господь к Моисею, глаголя:

² повели сыном Израилевым, и да изгонят из полка всякаго прокаженнаго, и всякаго проливающаго семя, и всякаго нечистаго душею:

³ от мужеска полу до женска, изгоните вне полка, и да не осквернят полков своих, в нихже Аз пребываю.

⁴ И сотвориша сынове Израилевы тако, и изгнаша их вне полка: якоже глагола Господь Моисею, тако сотвориша сынове Израилевы.

⁵ И рече Господь к Моисею, глаголя:

⁶ рцы сыном Израилевым, глаголя: муж или жена, иже аще сотворит от всех грехов человеческих и презирая презрит Господа, и преступит душа она:

⁷ да исповесть грех, егоже сотвори, и да отдаст преступление истое, пятую часть его да приложит к тому, и да отдаст, емуже согреши.

⁸ Аще же несть человеку ужика, яко отдати ему преступление, преступление отдаемое Господу, жерцу да будет, кроме овна очищения, имже помолится о нем.

⁹ И всяк начаток, и вся освящаемая в сынех Израилевых, елика аще приносят Господу, жерцу самому да будут:

¹⁰ и коегождо освященая, тому да будут и муж аще даст жерцу, тому да будет.

¹¹ И рече Господь к Моисею, глаголя:

¹² глаголи сыном Израилевым и речеши к ним: мужа, мужа аще преступит жена его, и презирающи презрит его,

¹³ и будет кто с нею ложем семене, и утаится от очию мужа ея, и укрыется, она же будет осквернена, и свидетеля не будет на ню и сия несть ята,

¹⁴ и приидет на него дух ревнования, и возревнует к жене своей, она же осквернена есть, или приидет ему дух ревнования, и возревнует к жене своей, она же не будет осквернена,

¹⁵ и да приведет муж жену свою к жерцу, и да принесет дар за ню, десятую часть меры ефи муки ячныя: да не возлиет на ню елеа, ниже да возложит на ню ливана: жертва бо ревнования есть, жертва памяти воспоминающая грех.

¹⁶ И приведет ю жрец и поставит ю пред Господем:

¹⁷ и да возмет жрец воду живу чисту в сосуде глиняне, и от персти на земли сущия у скинии свидения, и взем жрец да всыплет в воду:

¹⁸ и да поставит жрец жену пред Господем, и да открыет главу жене, и да даст в руце ея жертву памяти, жертву ревнования: в руце же жерца да будет вода обличения клятвенная сия.

¹⁹ И да закленет ю жрец и речет жене: аще никтоже бысть с тобою, и неси преступила осквернитися под мужем твоим, невинна буди от воды обличения клятвенныя сея:

²⁰ аще же преступила еси, мужата сущи, или осквернена еси, и даде кто тебе ложе свое, кроме мужа твоего.

²¹ И закленет жрец жену клятвами клятвы сея, и речет жрец жене: да даст тя Господь в клятву и проклятие среди людий твоих, внегда дати Господу стегну твоему отпасти и чреву твоему разсестися:

²² и внидет вода клятвенная сия во чрево твое, еже расторгнути утробу твою, и отпасти стегну твоему. И отвещает жена:

²³ и да напишет жрец клятвы сия в книзе, и изгладит в воде обличения клятвеннаго:

²⁴ и напоит жену водою обличения клятвенною, и внидет в ню вода клятвенная обличения.

²⁵ И да возмет жрец от руки женски жертву ревнования, и да возложит жертву пред Господем, и да принесет ю ко олтарю:

²⁶ и да возмет жрец горстию от жертвы память ея, и да принесет ю на олтарь, и по сем напоит водою жену.

²⁷ И будет аше есть осквернена, и аще утаением утаися от мужа своего, и внидет в ню вода клятвенная обличения, и надмет чрево ея, и отпадет стегно ея, и будет жена в проклятие в людех своих:

²⁸ аще же не будет осквернена жена, и чиста есть, и невинна будет, и плодствовати будет семя.

²⁹ Сей закон ревнования, комулибо аще преступит жена, мужата сущи, и осквернится:

³⁰ или человек, емуже аще найдет нань дух ревнования, и возревнует к жене своей, и поставит жену свою пред Господем, и да сотворит ей жрец весь закон сей:

³¹ и чист будет человек от греха, и жена та возмет грех свой.