Библия на церковно-славянском языке - транслитерация современным русским алфавитом
(1751)

Четвёртая книга Моисеева Числа

◄◄ | ◄ | Глава ⚫ | ► | ►►

¹ И рече Господь к Моисею, глаголя:

² отмсти месть сынов Израилевых от Мадианитов, и последи приложишися к людем своим.

³ И рече Моисей к людем, глаголя: вооружите от вас мужы и ополчитеся пред Господем на Мадиама, отдати отмщение от Господа Мадиаму:

⁴ тысящу от племене и тысящу от племене, от всех племен сынов Израилевых, послите ополчитися.

⁵ И сочтоша от тысящ Израилевых, по тысящи от племене, дванадесять тысящ вооруженых на брань.

⁶ И посла я Моисей тысящу от племене и тысящу от племене с силою их, и Финееса сына Елеазарова сына Аарона жерца: и сосуды святыя, и трубы знаменныя в руках их.

⁷ И ополчишася на Мадиама, якоже повеле Господь Моисею, и избиша весь мужеск пол:

⁸ и царей Мадиамских убиша вкупе с язвеными их, и Евина и Рокома, и Сура и Ура и ровока, пять царей Мадиамлих: и Валаама сына Веорова убиша мечем с язвеными их:

⁹ и плениша жен Мадиамлих и имения их, и скоты их и вся притяжания их, и силу их плениша:

¹⁰ и вся грады их, яже во обитаниих их, и веси их пожгоша огнем,

¹¹ и взяша весь плен их и вся корысти их, от человека до скота:

¹² и приведоша к Моисею и ко Елеазару жерцу и ко всем сыном Израилевым плен и корысти и имение в полк, во аравоф Моавль, иже есть у Иордана при Иерихоне.

¹³ И изыде Моисей и Елеазар жрец и вси князи сонма в сретение им вне полка.

¹⁴ И разгневася Моисей на надзирателей силы, тысященачалников и стоначалников идущих от ополчения брани.

¹⁵ И рече им Моисей: вскую жив остависте весь женск пол?

¹⁶ Тыя бо быша сыном Израилевым, по словеси Валаамлю, еже отступити и презрети слово Господне Фогора ради, и бысть язва в сонме Господни:

¹⁷ и ныне избийте всяк мужеск пол во всяком возрасте, и всяку жену, яже позна ложе мужеско, избийте:

¹⁸ и всяк возраст женск, яже не познаша ложа мужеска, живых оставите я:

¹⁹ и вы станите вне полка седмь дний: всяк убивый душу и прикоснувыйся убиеному да очистится в третий день и в день седмый, вы и плен ваш:

²⁰ и всяку одежду, и всяк сосуд кожан, и всяко соделаное от козличины, и всяк сосуд древян очистите.

²¹ И рече Елеазар жрец к мужем силы приходящым от ополчения ратнаго: сие оправдание закона, еже заповеда Господь Моисею:

²² кроме сребра и злата, и меди и железа, и касситера и олова,

²³ всяка вещь, яже пройдет сквозе огнь, и (огнем) очистится, но и водою очищения очистится: и вся, елика аще не пройдут сквозе огнь, да пройдут сквозе воду:

²⁴ и исперите ризы вашя в день седмый, и очиститеся: и по сих внидете в полк.

²⁵ И рече Господь к Моисею, глаголя:

²⁶ возмите сочисление корыстей плена от человека до скота, ты и Елеазар жрец и князи отечеств сонма,

²⁷ и разделите корысти между воины ходившими на брань и между всем сонмом,

²⁸ и отлучите дань Господу от людий военных ходивших на брань, едину душу от пяти сот, от человек и от скотов, и от волов и от овец и от ослят,

²⁹ и от половины их да возмете, и даси Елеазару жерцу начатки Господни:

³⁰ и от половины сынов Израилевых да возмеши едино от пятидесяти человек, и от волов и от овец, и от ослят и от всех скотов, и даси я левитом, иже стрегут стражбы в скинии Господни.

³¹ И сотвори Моисей и Елеазар жрец, якоже повеле Господь Моисею.

³² И бысть множество плена, егоже плениша мужи воинстии, от овец шесть сот седмьдесят пять тысящ,

³³ и волов седмьдесят две тысящы,

³⁴ и ослов шестьдесят едина тысяща,

³⁵ и душ человеческих от женска полу, яже не познаша ложа мужеска, всех душ тридесять две тысящы:

³⁶ и бысть половина часть ходивших на брань, от числа овец триста тридесять седмь тысящ и пять сот:

³⁷ и бысть дань Господу от овец шесть сот седмьдесят пять:

³⁸ и волов тридесять шесть тысящ, и дань Господу седмьдесят и два:

³⁹ и ослов тридесять тысящ пять сот, и дань Господу шестьдесят един:

⁴⁰ и душ человеческих шестьнадесять тысящ, и дань от сих Господу тридесять две души.

⁴¹ И даде Моисей дань Господу, участие Божие Елеазару жерцу, якоже повеле Господь Моисею.

⁴² От половины сынов Израилевых, ихже раздели Моисей от мужей военных:

⁴³ и бысть половина от сонма, от овец триста и тридесять седмь тысящ и пять сот:

⁴⁴ и волов тридесять шесть тысящ:

⁴⁵ ослов тридесять тысящ и пять сот:

⁴⁶ и человечих душ шестьнадесять тысящ:

⁴⁷ и взя Моисей от половины сынов Израилевых, едино от пятидесяти, от человек и от скотов, и даде я левитом стрегущым стражбы скинии Господни, якоже повеле Господь Моисею.

⁴⁸ И приидоша к Моисею вси поставленнии над тысящами силы, тысященачалники и стоначалники,

⁴⁹ и рекоша к Моисею: отроцы твои взяша сочтение от мужей воинских, иже суть у нас, и никтоже погибе от них:

⁵⁰ и принесохом дар Господу, муж еже обрете, сосуд злат и обручие, и гривну и перстень, и усерязи и чепь златую, умолити о нас пред Господем.

⁵¹ И взя Моисей и Елеазар жрец злато от них, всяк сосуд соделан.

⁵² И бысть всего злата участие, еже отлучися Господу, шестьнадесять тысящ и седмь сот и пятьдесят сикль от тысященачалников и от стоначалников.

⁵³ И мужи воинстии плениша кийждо себе.

⁵⁴ И взяша Моисей и Елеазар жрец злато от тысященачалников и от стоначалников и внесоша е в скинию свидения, в память сынов Израилевых пред Господем.