Библия на церковно-славянском языке - транслитерация современным русским алфавитом
(1751)

Четвёртая книга Моисеева Числа

◄◄ | ◄ | Глава ⚫ | ► | ►►

¹ И живяше Израиль в Саттиме, и осквернишася людие блужением со дщерми Моавли:

² и призваша я в требы кумир своих, и ядоша людие требы их и поклонишася кумиром их:

³ и причастися Израиль Веельфегору, и разгневася яростию Господь на Израиля.

⁴ И рече Господь к Моисею: поими вся князи людския, и обличи я Господу прямо солнцу, и отвратится гнев ярости Господни от Израиля.

⁵ И рече Моисей к племенем Израилским: избийте кийждо ужика своего служившаго Веельфегору.

⁶ И се, человек от сынов Израилевых пришед приведе брата своего к Мадианитыне пред Моисеем и пред всем сонмом Израилевым: сии же плакахуся пред дверми скинии свидения.

⁷ И видев Финеес, сын Елеазара сына Аарона жерца, воста из среды сонма, и взем сулицу в руку,

⁸ вниде вслед человека Израилтянина в блудилище, и прободе обоих, и человека Израилтянина, и жену сквозе ложесна ея: и преста вред от сынов Израилевых.

⁹ И быша умершии язвою двадесять четыри тысящы.

¹⁰ И рече Господь к Моисею, глаголя:

¹¹ Финеес сын Елеазара сына Аарона жерца утоли гнев Мой от сынов Израилевых, егда возревнова ревность Моя в них, и не потребих сынов Израилевых в ревности Моей:

¹² тако рцы: се, Аз даю ему заветзавет Мой мирный,

¹³ и будет ему и семени его по нем завет жречества вечный, понеже возревнова по Бозе своем и умилостиви о сынех Израилевых.

¹⁴ Имя же человеку Израилтянину, егоже уби с Мадианитынею, Замврий сын Салмонь, князь дому отечества сынов Симеоних:

¹⁵ и имя жене Мадианитыне прободеной Хазви, дщи Сура, князя рода Соммофова, дому отечества есть Мадиамля.

¹⁶ И рече Господь к Моисею, глаголя: рцы сыном Израилевым, глаголя:

¹⁷ враждуйте Мадианитом и бийте я:

¹⁸ зане враждуют вам сии лестию, елико прельщают вас Фогором и Хазвиею дщерию князя Мадиамля, сестрою своею прободеною, в день язвы Фогора ради.