Библия на церковно-славянском языке - транслитерация современным русским алфавитом
(1751)

Четвёртая книга Моисеева Числа

◄◄ | ◄ | Глава ⚫ | ► | ►►

¹ И рече Валаам к Валаку: созижди мне зде седмь требищ, и уготовай мне зде седмь телцев и седмь овнов.

² И сотвори Валак, якоже рече ему Валаам: и вознесе телца и овна на требище.

³ И рече Валаам к Валаку: стани у требы своея, и пойду, аще явится мне Бог в сретение, и слово, еже мне укажет, повем тебе. И ста Валак у требы своея.

⁴ И Валаам иде вопросити Бога, и иде прямо: и явися Бог Валааму. И рече к нему Валаам: седмь требищ изготових и возложих телца и овна на требище.

⁵ И вложи Бог слово во уста Валааму и рече: возвратився к Валаку тако глаголи.

⁶ И возвратися к нему: он же стояше у всесожжений своих, и вси князи Моавли с ним: и бысть Дух Божий на нем.

⁷ И восприим притчу свою рече: от Месопотамии приведе мя Валак царь Моавль, от гор восточных, глаголя: гряди, проклени ми Иакова, и гряди, проклени ми Израиля:

⁸ что проклену, егоже не кленет Господь? Или что зло реку, егоже не злословит Бог?

⁹ Яко от верха гор узрю его и от холм проуразумею его: се, людие едини населятся и со языки не вменятся:

¹⁰ кто изследит семя Иаковле? И кто изочтет сонмы Израиля? Да умрет душа моя в душах праведных, и буди семя мое, якоже семя их.

¹¹ И рече Валак к Валааму: что сотворил еси ми? На проклятие враг моих призвах тя, и се, благословил еси (я) благословением.

¹² И рече Валаам к Валаку: не елика ли вложит Бог во уста моя, сие сохраню глаголати?

¹³ И рече к нему Валак: пойди еще со мною на место ино, с негоже не узриши их оттуду, но разве часть некую их узриши, всех же не узриши, и проклени ми их оттуду.

¹⁴ И поя его на стражу села, на верх Истесанаго, и созда тамо седмь требищ, и возложи телца и овна на требище.

¹⁵ И рече Валаам к Валаку: стани у требы своея, аз же пойду вопросити Бога.

¹⁶ И срете Бог Валаама, и вложи слово во уста ему и рече: возвратися к Валаку, и речеши сия.

¹⁷ И возвратися к нему: он же стояше у всесожжений своих, и вси князи Моавли с ним. И рече ему Валак: что глагола Господь?

¹⁸ И восприим притчу свою, рече: востани, Валак, и послушай, внуши свидетель, сыне Сепфоров:

¹⁹ не яко человек Бог колеблется, ниже яко сын человеческий изменяется: Той глаголаше, не сотворит ли? Речет, и не пребудет ли?

²⁰ Се, благословляти приведен есмь: благословлю, и не отвращу:

²¹ не будет труда во Иакове, ниже узрится болезнь во Израили: Господь Бог его с ним, слава царская на нем:

²² Бог изведый его из Египта, якоже слава единорога в нем:

²³ несть бо вражбы во Иакове, ниже волхвования во Израили: во время наречется Иакову и Израилю, что совершит Бог:

²⁴ се, людие яко львичища востанут, и яко лев вознесется: не уснет, дондеже снест лов и кровь посеченых испиет.

²⁵ И рече Валак к Валааму: ни клятвами мне клени их, ниже благословением благослови их.

²⁶ И отвещав Валаам, рече к Валаку: не рех ли ти, глаголя: слово, еже аще возглаголет Бог, сие сотворю?

²⁷ И рече Валак к Валааму: гряди, пойму тя на место ино, аще угодно будет Богу, и проклени ми их оттуду.

²⁸ И поя Валак Валаама на верх Фогора, простирающася в пустыню.

²⁹ И рече Валаам к Валаку: созижди мне зде седмь требищ, и уготовай мне зде седмь телцев и седмь овнов.

³⁰ И сотвори Валак, якоже рече ему Валаам: и вознесе телца и овна на требище.