Библия на церковно-славянском языке - транслитерация современным русским алфавитом
(1751)

Четвёртая книга Моисеева Числа

◄◄ | ◄ | Глава ⚫ | ► | ►►

¹ И рече Господь к Моисею, глаголя:

² глаголи сыном Израилевым, и возми от них но единому жезлу, жезл от всех князей их, по домом отечества их, дванадесять жезлов, имя же коегождо напиши на жезле его,

³ и имя Аароне напиши на жезле Левиине: есть бо жезл един: по племени дому отечеств своих да дадят:

⁴ и да положиши их в скинии свидения, прямо свидению, в нихже явлюся тебе ту:

⁵ и будет человек, егоже аще изберу, жезл его прозябнет: и отиму от мене роптание сынов Израилевых, елика сии ропщут на вы.

⁶ И глагола Моисей сыном Израилевым: и даша ему вси князи их по жезлу, князя единаго жезл, по княжению, по домом отечеств их, дванадесять жезлов: и жезл Ааронь посреде жезлов их.

⁷ И положи Моисей жезлы пред Господем в скинии свидения.

⁸ И бысть на утрие, и вниде Моисей и Аарон в скинию свидения: и се, прозябе жезл Ааронь в дому Левиине, и израсти ветвь, и процветоша цвети, и израсти орехи:

⁹ и изнесе Моисей вся жезлы от лица Господня ко всем сыном Израилевым: и видеша, и взя кийждо жезл свой.

¹⁰ И рече Господь к Моисею: отложи жезл Ааронь пред свидением в сохранение, в знамение сынов ослушливых: и да престанет роптание их от Мене, и не измрут.

¹¹ И сотвори Моисей и Аарон, якоже повеле Господь Моисею, тако сотвориша.

¹² И рекоша сынове Израилевы к Моисею, глаголюще: се, потребихомся, погибохом, исчезохом:

¹³ всяк прикасаяйся ко скинии свидения Господня умирает: даже до конца ли умирающе погибнем?