Библия на церковно-славянском языке - транслитерация современным русским алфавитом
(1751)

Четвёртая книга Моисеева Числа

◄◄ | ◄ | Глава ⚫ | ► | ►►

¹ И рече Господь к Моисею, глаголя:

² глаголи сыном Израилевым и речеши к ним: егда внидете в землю вселения вашего, юже Аз даю вам,

³ и сотворите принос Господу во всесожжение или жертву, еже возвеличити мольбу, или благовольну, или в праздники вашя в воню благовония Господу, аще убо от волов, или от овец:

⁴ и да принесет приносяй дар свой Господу жертву, муки пшеничны десятую часть ефи (меры), вмешены в елей четвертыя части ина (меры):

⁵ и вина на возлияние четвертую часть ина сотворите во всесожжение или в жертву: агнцу единому да сотвориши толико, принос воню благовония Господу.

⁶ И овну, егда творите его во всесожжение или в жертву, да сотвориши жертву муки пшеничны две десятины вмешаны в елеи, третию часть ина (меры):

⁷ и вина на возлияние третию часть ина принесете в воню благовония Господу.

⁸ Аще же творите от волов во всесожжение или в жертву, еже возвеличити мольбу, или во спасителное Господу,

⁹ и принесет с телцем принос муки пшеничны три десятины вмешаны в елей, пол ина (меры):

¹⁰ и вина на возлияние пол ина (меры), принос в воню благовония Господу.

¹¹ Тако да сотвориши телцу единому, или овну единому, или агнцу единому от овец или от коз:

¹² по числу их, яже аще сотворите, тако сотворите единому по числу их.

¹³ Всяк туземец да сотворит тако сицевая принести приношения в воню благовония Господу:

¹⁴ аще же пришлец в вас прибудет в земли вашей, или иже аще будет в вас в родех ваших, и сотворит принос в воню благовония Господу, якоже творите вы, тако да сотворит.

¹⁵ Сонме Господнь, закон един да будет вам и пришелцем прилежащым в вас, закон вечный в роды вашя: якоже вы, (тако) и пришлец да будет пред Господем:

¹⁶ закон един да будет и оправдание едино да будет вам и пришелцу прилежащему в вас.

¹⁷ И рече Господь к Моисею, глаголя:

¹⁸ глаголи сыном Израилевым и речеши к ним: егда внидете в землю, в нюже Аз ввожду вас тамо,

¹⁹ и будет егда ясте от хлебов земли (тоя), отложите участие во отделение Господу: начаток теста вашего,

²⁰ хлеб отлучите участие оное: якоже участие от гумна,

²¹ тако отделите той хлеб, начаток теста вашего, и дадите Господу участие в роды вашя.

²² Егда же согрешите и не сотворите всех заповедий сих, ихже глагола Господь Моисею,

²³ якоже повеле Господь Бог к вам рукою Моисеовою, от дне в оньже повеле Господь к вам, и потом в роды вашя,

²⁴ и будет аще от очес сонма сотворится неволею, и да сотворит весь сонм телца единаго непорочна от волов во всесожжение, в воню благовония Господу, и жертву сего, и возлияние его по уставлению, и козла единаго от коз греха ради:

²⁵ и да помолится жрец от всем сонме сынов Израилевых, и оставится им, яко нехотение есть: и сии принесоша дар свой, принесение Господу греха ради своего пред Господем, нехотений ради своих,

²⁶ и оставится всему сонму сынов Израилевых и пришелцу прилежащему в вас, яко всем людем нехотенное.

²⁷ Аще же душа едина не хотящи согрешит, да приведет козу едину единолетну греха ради:

²⁸ и да помолится жрец о души нехотевшей и согрешшей нехотением пред Господем, и да помолится о ней, и оставится ей.

²⁹ Населнику (земли) сынов Израилевых и пришелцу прилежащему в них, закон един да будет им, иже аще сотворит не хотящь.

³⁰ И душа яже сотворит рукою гордости от туземец или от пришелцев, Бога сия разгневает, и потребится душа та от людий своих:

³¹ яко слово Господне презре и заповеди Его разсыпа, сотрением да сотрется душа та: и грех ея на ней.

³² И бяху сынове Израилевы в пустыни, и обретоша мужа собирающа дрова в день субботный,

³³ и приведоша его обретшии собирающа дрова в день субботный к Моисею и Аарону и ко всему сонму сынов Израилевых,

³⁴ и ввергоша его в темницу: не совещаша бо, что сотворят ему.

³⁵ И рече Господь к Моисею, глаголя: смертию да умрет человек сей, да побиете его камением весь сонм вне полка.

³⁶ И изведоша его весь сонм вне полка, и побиша его камением весь сонм вне полка, якоже глагола Господь Моисею.

³⁷ И рече Господь к Моисею, глаголя:

³⁸ глаголи сыном Израилевым и речеши им: и да сотворят себе рясны на воскрилиих риз своих в роды своя: и возложите на рясны воскрилий прядение синее,

³⁹ и будет вам на ряснах: и узрите их, и воспомянете вся заповеди Господни и сотворите я, и не развратитеся вслед мыслей своих и вслед очес ваших, имиже вы соблудисте вслед их:

⁴⁰ яко да помянете и сотворите вся заповеди Моя, и будете святи Богу вашему:

⁴¹ Аз Господь Бог ваш, изведый вас из земли Египетския, быти вам Бог: Аз Господь Бог ваш.