Библия на церковно-славянском языке - транслитерация современным русским алфавитом
(1751)

Книга Неемии

◄◄ | ◄ | Глава ⚫ | ► | ►►

¹ И бысть егда услыша Санаваллат, яко мы созидаем стены, и зло ему вменися, и разгневася зело, и посмеяшеся Иудеом,

² и рече пред братиею своею, иже бяху сила Соморов, и рече: что Иудее сии созидают свой град? Еда жрети будут? Или возмогут? Или днесь изцелят камение, повнегда быти им в прах земли сожженным?

³ И Товиа Амманитянин близ его прииде и рече им: еда пожрут, или ясти имут на месте своем? Не взыдет ли лисица и разорит стену каменей их?

⁴ И рече Неемиа: услыши, Боже наш, яко сотворени есмы в посмеяние,

⁵ и обрати поношение их на главу их, и даждь их в посмеяние в землю пленения,

⁶ и не покрый беззакония их.

⁷ Бысть же егда услыша Санаваллат и Товиа, и Аравляне и Амманите, яко взыде отрасль стен Иерусалимских, зане начаша разселины заграждати, и зло им явися зело.

⁸ И собрашася вси вкупе, да приидут и ополчатся на Иерусалим и разорят его.

⁹ И молихомся ко Богу нашему и поставихом стражы на стене противу их день и нощь от лица их.

¹⁰ Рече же Иуда: истомлена есть сила (от) враг, и земля многа есть, и мы не можем созидати стены.

¹¹ И рекоша оскорбляющии нас: не познают и не увидят, дондеже приидем посреде их и убием их, и престати сотворим делу.

¹² И бысть егда приидоша Иудее, иже обитаху близ их, и реша нам: восходят от всех язык на ны.

¹³ И поставих в нижайших местех созади стен в закровении, и поставих люди по племеном с мечи их и с сулицами их и с луками.

¹⁴ И видех, и востах, и рекох ко честным и к воеводам и ко прочым людем: не убойтеся от лица их, помяните Господа Бога нашего великаго и страшнаго, и ополчитеся за братию вашу, за сыны вашя и дщери вашя, жены вашя и домы вашя.

¹⁵ Бысть же егда услышаша врази наши, яко ведомо бысть нам, и разори Бог совет их: и возвратихомся вси мы на стены, кийждо ко делу своему.

¹⁶ И бысть от дне того, пол вчиненых делаху дело, и половина их уготована бысть ко брани с сулицами и щитами, и луки и бронями, и началницы созади всего дому Иудина.

¹⁷ Созидающии стену и носящии бремена со оружием: единою рукою своею творяху дело, а другою держаху мечь.

¹⁸ Созидающым же единому коемуждо мечь бысть опоясан при бедре его, и созидаху, и трубяху трубами близ их.

¹⁹ И рекох ко честным и ко старейшинам и ко прочым людем: дело велико есть и пространно, и мы разлучени есмы на стене далече кийждо от брата своего:

²⁰ на месте идеже услышите глас трубный, тамо тецыте к нам, и Бог наш ополчится о нас.

²¹ И мы быхом творяще дело, и пол нас держаху сулицы от восхода зари утренния даже до восхода звезд.

²² Во время же то рекох людем: кийждо со отроком своим да пребывает в среде Иерусалима: и будет вам нощь на стражу, а день на делание.

²³ Аз же и братия мои и отроцы и мужие стражи, иже бяху созади мене, не снимахом одеяний наших тамо ни един от нас.