Бiблiя беларуская - пераклад Василя Сёмухи
(1995, Минск)

Нээмiя

◄◄ | ◄ | Глава ⚫ | ► | ►►

¹ Вось сьвятары і лявіты, якія прыйшлі з Зарававэлем, сынам Салатыілавым, і зь Ісусам: Сэрая, Ерамія, Эзра,

² Амарыя, Малух, Хатуш,

³ Шэханія, Рэхум, Мэрэмот,

⁴ Іда, Гінэтой, Авія,

⁵ Міямін, Маадыя, Вілга,

⁶ Шэмая, Ёярыў, Едая,

⁷ Салу, Амок, Хэлкія, Едая. Гэта ўзначальцы сьвятароў і браты іхнія ў дні Ісуса.

⁸ А лявіты: Ісус, Бінуй, Кадмііл, Шэрэвія, Юда, Матанія, галоўны пры славаслоўі, ён і браты ягоныя,

⁹ і Бакбукія і Уній, браты іхнія, разам зь імі адказныя за варту.

¹⁰ Ісус спарадзіў Ёакіма, Ёакім спарадзіў Эльяшыва, Эльяшыў спарадзіў Ёяду,

¹¹ Ёяда спарадзіў Ёнатана, Ёнатан спарадзіў Ядуя.

¹² У дні Ёакіма былі сьвятары, узначальцы пакаленьняў: з дому Сэраі Мэрая, з дому Ераміі Хананія,

¹³ з дому Эздры Мэшулам, з дому Амарыі Ёханан,

¹⁴ з дому Мэліху Ёнатан, з дому Шэваніі Язэп,

¹⁵ з дому Харыма Адна, з дому Мэраёта Хэдкія,

¹⁶ з дому Іда Захарыя, з дому Гінэтона Мэшулам,

¹⁷ з дому Авіі Захрый, з дому Міньяміна, з дому Маадыі Пілтай,

¹⁸ з дому Вілгі Шамуй, з дому Шэмаі Ёнатан,

¹⁹ з дому Ёярыва, з дому Едаі Узій,

²⁰ з дому Салая Калай, з дому Амока Эвэр,

²¹ з дому Хэлкіі Хашавія, з дому Едаі Натанаіл.

²² Лявіты, узначальцы пакаленьняў, унесены ў запіс у дні Эльяшыва, Ёяды, Ёханана і Ядуя, і таксама сьвятары ў валадараньне Дарыя Персідскага.

²³ Сыны Лявія, узначальцы пакаленьняў, упісаны ў летапісы да дзён Ёханана, сына Эльяшыва.

²⁴ Узначальцы лявітаў: Хашавія, Шэрэвія і Ісус, сын Кадмііла, і браты іхнія, пры іх пастаўленыя дзеля праслаўленьня пры падзякаваньнях, паводле ўстанаўленьня Давіда, чалавека Божага - зьмена за зьменаю.

²⁵ Матанія, Бакбукія, Авадыя, Мэшулам, Талмон, Акуў - вартавыя, брамнікі на варце каля парогаў брамных.

²⁶ Яны былі ў дні Ёакіма, сына Ісусавага, сына Ёсэдэкавага, і ў дні начальніка вобласьці і кніжніка Эздры, сьвятара.

²⁷ Пры асьвячэньні сьцяны Ерусалімскай запатрабавалі лявітаў з усіх мясьцінаў іхніх, загадваючы ім прыйсьці ў Ерусалім дзеля ўчыненьня асьвячэньня і радаснага сьвята з праслаўленьнямі і песьнямі пад гукі кімвалаў, псалтыроў і гусьляў.

²⁸ І сабраліся сыны сьпевакоў з акругі Ерусалімскай і зь сёлаў Нэтафацкіх,

²⁹ і з Бэт-Гагілгала, і з палёў Гевы і Азмавэта, бо сьпевакі пабудавалі сабе вёскі ў навакольлі Ерусаліма.

³⁰ І ачысьціліся сьвятары і лявіты, і ачысьцілі народ і браму і сьцяну.

³¹ Тады я павёў начальнікаў у Юдэі на сьцяну і паставіў два вялікія хоры на чале шэсьця, і адзін зь іх ішоў з правага боку сьцяны да Гнаявое брамы.

³² За імі ішоў Гашая і палавіна начальнікаў у Юдэі,

³³ Азарыя, Эздра і Мэшулам,

³⁴ Юда і Веньямін, і Шэмая і Ерамія,

³⁵ а з сыноў сьвятаровых з трубамі: Захарыя, сын Ёнатана, сын Шэмаі, сын Матаніі, сын Міхея, сын Закхура, сын Асафа,

³⁶ і браты ягоныя: Шэмая, Азарыіл, Мілалай, Гілалай, Маай, Натанаіл, Юда і Хананій з музычнымі спарудамі Давіда, чалавека Божага.

³⁷ Каля брамы Крыніцы, насупраць іх, яны падняліся па прыступках горада Давідавага па лесьвіцы, якая вяла на сьцяну вышэй дома Давідавага, да Вадзяное брамы на ўсход.

³⁸ Другі хор ішоў насупраць іх, і за ім я і палавіна народу, па сьцяне ад Пячной вежы і да шырокай сьцяны,

³⁹ і ад брамы Яфрэмавай, міма старое брамы і брамы Рыбнай і брамы Хананэла і брамы Мэа, да Авечае брамы, і спыніліся каля брамы Цямнічнай.

⁴⁰ Потым абодва хоры сталі каля дома Божага, і я і палавіна начальнікаў са мною,

⁴¹ і сьвятары: Эльякім, Маасэя, Міньямін, Міхей, Эльёэнай, Захарыя, Хананія з трубамі,

⁴² і Маасэя і Шэмая, і Элеазар і Узій, і Ёханан і Малхія, і Элам і Эзэр. І сьпявалі сьпевакі гучна; галоўны ў іх быў Ізрахія.

⁴³ І прыносілі ў той дзень вялікія ахвяры і весяліліся, бо Бог даў ім вялікую радасьць. Весяліліся і жанчыны і дзеці, і весялосьць Ерусаліма далёка было чуваць.

⁴⁴ У той самы дзень прыстаўлены былі людзі да кладовых пакояў для прынашэньняў пачаткаў і дзесяцінаў, каб зьбіраць з палёў пры гарадах часткі, пакладзеныя законам для сьвятароў і лявітаў, бо Юдэям радасна было глядзець на сьвятароў і лявітаў, якія стаялі,

⁴⁵ якія правілі службу Богу свайму і дзеі ачышчэньня і былі сьпевакамі і брамнікамі паводле ўстанаўленьня Давіда і сына яго Саламона.

⁴⁶ Бо здаўна ў дні Давіда і Асафа былі ўстаноўлены ўзначальцы сьпевакоў і песьні Богу, пахвальныя і падзякавальныя.

⁴⁷ Усе Ізраільцяне ў дні Зарававэля і ў дні давалі часткі сьпевакам і брамнікам на кожны дзень і аддавалі сьвятыні лявітам, а лявіты аддавалі сьвятыні сынам Аарона.