Библия на церковно-славянском языке - транслитерация современным русским алфавитом
(1751)

Книга пророка Михея

◄◄ | ◄ | Глава ⚫ | ► | ►►

¹ Ныне оградится дщи Ефремова ограждением, рать учини на вы, жезлом поразят о челюсть племен Израилевых.

² И ты, Вифлееме, доме Ефрафов, еда мал еси, еже быти в тысящах Иудиных? Из тебе бо Мне изыдет Старейшина, Еже быти в Князя во Израили, исходи же Его из начала от дний века.

³ Сего ради даст я, до времене раждающия породит, и прочии от братии их обратятся к сыном Израилевым.

⁴ И станет, и узрит, и упасет паству Свою крепостию Господь, и в славе имене Господа Бога Своего пребудут: зане ныне возвеличится даже до конец земли.

⁵ И будет Сей мир, егда Ассур приидет на землю вашу, и егда взыдет на страну вашу, и востанут нань седмь пастырей и осмь язв человеческих,

⁶ и упасут Ассура оружием и землю Невродову копиями ея, и избавит от Ассура, егда приидет на землю вашу и егда вступит на пределы вашя.

⁷ И будет останок Иаковль в языцех среде людий многих, аки роса от Господа падающи и яко агнцы на злаце, яко да не соберется ни един, ниже постоит в сынех человеческих.

⁸ И будет останок Иаковль в языцех среде людий многих, аки лев в скотех в дубраве и яко львичищь в стадех овчих, якоже егда пройдет, и отлучив восхитит, и не будет изимающаго.

⁹ Вознесется рука твоя на оскорбляющыя тя, и вси врази твои потребятся.

¹⁰ И будет в той день, глаголет Господь, потреблю кони твоя из среды твоея и погублю колесницы твоя,

¹¹ и потреблю грады земли твоея и развергу вся твердыни твоя,

¹² и отвергу волхвования твоя от руку твоею, и волхвующии не будут в тебе:

¹³ и потреблю изваянная твоя и кумиры твоя из среды тебе, и посем да не поклонишися делом рук твоих:

¹⁴ и посеку дубравы от среды тебе и погублю грады твоя:

¹⁵ и сотворю со гневом и с яростию месть языком, понеже не послушаша Мене.