Бiблiя беларуская - пераклад Василя Сёмухи
(1995, Минск)

Паводле Мацьвея

◄◄ | ◄ | Глава ⚫ | ► | ►►

¹ Ня судзеце, каб і вас ня судзілі;

² бо якім судом судзіце, такім вас судзіць будуць; і якою мераю мерыце, такою і вам будуць мерыць.

³ І што ты глядзіш на парушынку ў воку брата твайго, а калоды ў воку сваім не адчуваеш?

⁴ Альбо, як скажаш брату свайму: "Дай, я выму парушынку з вока твайго"; а вось у тваім воку калода?

⁵ Крывадушнік! вымі спачатку калоду са свайго вока, і тады ўбачыш, як выняць парушынку з вока брата твайго.

⁶ Не давайце сьвятога сабакам і ня кідайце пэрлаў вашых перад сьвіньнямі, каб яны не стапталі іх нагамі сваімі і, абярнуўшыся, не разадралі вас.

⁷ Прасеце, і дасца вам; шукайце, і знойдзеце; стукайцеся, і адчыняць вам;

⁸ бо кожны, хто просіць, атрымлівае, і, хто шукае, знаходзіць, і хто стукаецца, таму адчыняць.

⁹ Ці ёсьць сярод вас такі чалавек, які, калі папросіць сын ягоны ў яго хлеба, камень падаў бы яму?

¹⁰ і калі рыбы папросіць, зьмяю падаў бы яму?

¹¹ Дык вось, калі вы, ліхія, умееце дары добрыя даваць вашым дзецям, тым болей Айцец ваш, Які ёсьць у нябёсах, дасьць даброты тым, хто просіць у Яго.

¹² І вось усё, што хочаце, каб рабілі вам людзі, тое і вы рабеце ім; бо ў гэтым закон і прарокі.

¹³ Уваходзьце вузкаю брамаю; бо шырокая брама і прасторная дарога вядуць у пагібель, і многія ідуць імі;

¹⁴ бо вузкая брама і цесная дарога вядуць у жыцьцё, і нямногія знаходзяць іх.

¹⁵ Асьцерагайцеся ілжывых прарокаў, якія прыходзяць да вас у авечай адзежы, а ўсярэдзіне - ваўкі драпежныя;

¹⁶ па іхніх пладах пазнаеце іх. Ці ж зьбіраюць зь цярноўніку вінаград, альбо зь дзядоўніку смоквы?

¹⁷ Так усякае добрае дрэва родзіць і плады добрыя, а благое дрэва родзіць і плады благія:

¹⁸ ня можа добрае дрэва радзіць благія плады, ні дрэва благое радзіць плады добрыя.

¹⁹ Усякае дрэва, якое ня родзіць плоду добрага, сьсякаюць і кідаюць у вагонь.

²⁰ Дык вось, па пладах іхніх пазнаеце іх.

²¹ Ня кожны, хто кажа Мне: "Госпадзе! Госпадзе!" увойдзе ў Царства Нябеснае, а той, хто выконвае волю Айца Майго, Які ёсьць у нябёсах.

²² Многія скажуць Мне ў той дзень: "Госпадзе! Госпадзе! ці не ад Твайго імя мы прарочылі? і ці не Тваім імем дэманаў выганялі? і ці не Тваім імем многія цуды ўчынялі?".

²³ І тады абвяшчу ім: "Я ніколі ня знаў вас; адыдзеце ад Мяне, вы, што робіце беззаконьне".

²⁴ Дык вось, кожны, хто слухае гэтыя словы Мае і выконвае іх, прыпадобніцца да мужа разумнага, які збудаваў свой дом на камені;

²⁵ і паліўся дождж, і разьліліся рэкі, і падзьмулі вятры, і рынуліся на той дом; і ён ня ўпаў, бо пастаўлены быў на камені.

²⁶ А кожны, хто слухае гэтыя словы Мае і ня выконвае іх, прыпадобніцца да мужа неразважлівага, які паставіў свой дом на пяску;

²⁷ і паліўся дождж, і разьліліся рэкі, і падзьмулі вятры, і налеглі на дом той; і ён упаў, і было падзеньне яго вялікае.

²⁸ І сталася, калі Ісус прамовіў гэтыя словы, дзівавалі людзі з вучэньня Яго,

²⁹ бо Ён іх вучыў як той, хто мае ўладу, а не як кніжнікі і фарысэі.